وفاقی حکومت پورے ملک کے ساتھ ساتھ کراچی سمیت سندھ بھر میں بھی بجلی کی لوڈشیڈنگ پر قابوپانے کیلئے اقدامات کرے ۔ ر ابطہ کمیٹی

کراچی ۔۔۔ 21 جون 2015ء

متحدہ قومی موومنٹ کی رابطہ کمیٹی نے اپنے ایک بیان میں کہاکہ وفاقی حکومت پورے ملک میں بجلی کے بحران کے حل پر توجہ دینے کے ساتھ ساتھ کراچی سمیت سندھ بھر میں بھی بجلی کی لوڈشیڈنگ پر قابوپانے کیلئے اقدامات کرے ۔ اپنے ایک بیان میں ر ابطہ کمیٹی نے کہا کہ کراچی پاکستان کامعاشی دارالحکومت ہے جو قومی خزانے میں 70فیصدریونیو دیتاہے لیکن جب کراچی کے مسائل کوحل کرنے اور اس شہرکی زبوں حالی پرتوجہ دینے کی بات آتی ہے تووفاقی حکومت کارویہ سوتیلی ماں جیساہوتاہے۔رابطہ کمیٹی نے کہاکہ پورے ملک کی طرح کراچی میں بھی شدیدلوڈشیڈنگ ہورہی ہے جس سے نہ صرف کراچی کے شہریوں کی زندگی اجیرن بنتی جارہی ہے بلکہ بجلی کی لوڈ شیڈنگ کے باعث کاروباری اورتجارتی سرگرمیاں بھی بری طرح متاثرہورہی ہیں مگروفاقی حکومت کراچی میں بجلی کے بحران کے حل پر توجہ دینے کے بجائے اسے صرف ’’ کے الیکٹرک ‘‘ کی ذمہ داری قراردے کراس معاملے سے قطعی طورپرلاتعلقی کااظہارکررہی ہے ۔ رابطہ کمیٹی نے کہا کہ جوشہرپورے ملک کوپال رہاہو،جوملکی معیشت کوچلارہاہو اس شہر کے ساتھ وفاق کا ایسامتعصبانہ سلوک انتہائی شرمناک ہے ۔ کراچی میں بجلی کے بحران کوصرف کے الیکٹرک کی ذمہ داری قراردیکر وفاقی حکومت اپنی ذمہ داری سے عہدہ برآں نہیں ہوسکتی۔رابطہ کمیٹی نے وفاقی حکومت سے مطالبہ کیاکہ کراچی میں بجلی کے بحران پرقابوپانے کے لئے وہ بھی اپناکرداراداکرے ۔