اورنگی اور قصبہ علیگڑھ میں ایم کیو ایم کے بے گناہ کارکنان اور ہمدردوں کی بڑے پیمانے پر گرفتاری پر حق پرست اراکین قومی و صوبائی اسمبلی کی مذمت

کراچی:۔۔ 02؍ جون 2015ء 

اورنگی ٹاؤن ، قصبہ علیگڑھ سے منتخب ہونے والے حق پرست اراکین قومی و صوبائی اسمبلی نے اپنے مشترکہ بیان کے ذریعے ایم کیو ایم کے بے گناہ کارکنان و ہمدردوں کی بڑے پیمانے پر گرفتاریوں کی شدید الفاظ میں مذمت اور وفاقی اور صوبائی حکومت سے مطالبہ کیا ہے کہ سندھ حکومت کی متعصبانہ پالیسیوں اور پانی کی عدم فراہمی کے خلاف پرامن احتجاجی مظاہرہ کے کرنے والے بے گناہ ایم کیو ایم کے کارکنا اور ہمدردوں کو فوری طورپر رہا کیا جائے ۔حق پرست اراکین قومی صوبائی اسمبلی محبوب عالم ، اقبال قادری ، سیف الدین خالد ، محمد حسین اور مظاہر امیر نے کہا کہ مورخہ 24؍ مئی 2015ء کو اورنگی ٹاؤن اور قصبہ علیگڑھ کے عوام نے پانی کی عدم فراہمی اور حکومت سندھ کی متعصبانہ پالیسیوں کے خلاف ایک بھرپور مظاہرہ کیا تھا اس مظاہرے کے ذریعہ عوام نے سندھ حکومت پر عدم اعتماد کرتے ہوئے ایم کیو ایم اور قائد تحریک جناب الطاف حسین پر اپنے اعتماد کا اظہار کیا تھا، اس مظاہرے کے بعد اورنگی ٹاؤن اور قصبہ علیگڑھ کے عوام کو حکومت کے خلاف مظاہرہ کرنے پر سزا دینے کے لئے بے گناہ کارکنان و عوام کو گھروں سے دکانوں سے اور مختلف جگہوں سے گرفتار کرنے اور جھوٹے اور من گھڑت مقدمات قائم کرنے کا سلسلہ تیز کردیا گیا ہے ۔ حق پرست اراکین نے کہا کہ اورنگی ٹاؤن ایشیا کی سب سے بڑی کچی آبادی ہے یہاں کے عوام غویب اور محنت کش ہیں ، یہاں کے لوگ پہلے ہی حکومت کی متعصبانہ پالیسیوں کی وجہ سے بے پناہ مسائل کا شکار ہیں ۔ یہاں کے عوام پانی ، بجلی ، گیس ، صفائی ستھرائی ، سیوریج ، تعلیم صحت اور ٹرانسپورٹ کی سہولیات کی کمی کا پہلے ہی شکار ہیں اور دوسری طرف بے گناہ لوگوں کو گرفتار کرکے جھوٹے اور من گھڑت مقدمات میں ملوث کیا جارہا ہے ، رہائی کے عوض لاکھوں روپے رشوت وصول کی جاتی ہے ۔ حق پرست اراکین قومی و صوبائی اسمبلی نے کہا کہ ہم اورنگی و قصبہ علیگڑھ کے عوام و کارکنان کی گرفتاریوں کی پرزور مذمت کرتے ہیں اور صدر مملکت ممنون حسین ، وزیراعظم میاں نوازشریف ، گورنر سندھ ڈاکٹر عشرت العباد اور وزیراعلیٰ سندھ سے مطالبہ کیا ہے کہ متعصبانہ پولیس والوں کو اس قسم کے اقدمات کو رکوائیں اور اورنگی ٹاؤن عوام کو اس قسم کی مشکلات و پریشانیوں سے نجات دلائیں بے گناہ کارکنان اور ہمدردوں کو فوری طورپر رہا کیا جائے ۔