ایم کیوایم رابطہ کمیٹی کی خیبر پختونخوا کے بلدیاتی انتخابات میں آزاد امیدوار اور ایم کیو ایم ڈیرہ اسماعیل خان زون کے انچارج جنید طارق پر تحریک انصاف کے کارکنان اور حامیوں کی جانب سے قاتلانہ حملے کی مذمت

کراچی ۔۔۔30مئی2015ء

متحدہ قومی موومنٹ کی رابطہ کمیٹی نے خیبر پختونخوا میں ہونیوالے بلدیاتی انتخابات میں تحصیل پہاڑ پور سے آزاد امیدوار اور ایم کیو ایم ڈیرہ اسماعیل خان زون کے انچارج جنید طارق پر تحریک انصاف کے بلدیاتی امیدوار اور انکے حامیوں کی جانب سے قاتلانہ حملے کی سخت الفاظ میں مذمت کی ہے۔ ایک بیان میں رابطہ کمیٹی نے کہا کہ عام انتخابات برائے سال 2013ء میں دھاندلی کا رونا رونے والوں نے بلدیاتی انتخابات میں اپنی جیت کیلئے تمام حدیں پار کردی ہیں بلدیاتی الیکشن میں ہونیوالے دھاندلی کی بدترین مثال قائم کردی ہے ۔رابطہ کمیٹی نے کہاکہ تحریک انصاف کے ڈنڈا بردار اور مسلح کارکنان نے ایم کیو ایم کے نامزد حق پرست بلدیاتی امیدوار پر حملہ کرکے تمام پاکستانیوں پر ثابت کردیاہے کہ وہ حق پرستی کے پیغام کی خیبر پختونخوا کے غیور عوام میں پزیرائی سے شدید خوفزدہ ہیں ۔رابطہ کمیٹی نے حکومت سے مطالبہ کیا کہ وہ تحصیل پہاڑ پور سے نامزد ایم کیوایم کے امیدوار و زونل انچارج جنید طارق پر حملے میں ملوث افراد کے خلاف قانونی کارروائی کریں ۔رابطہ کمیٹی نے تحریک انصاف کے حامیوں اور کارکنان کے حملے میں زخمی ہونیوالے ایم کیوا یم کے امیدواراور انکے بھائی نوید عارف اور عرفان امیر کی جلد و مکمل صحتیابی کیلئے دعا کی ہے۔