ایم کیوایم کے تحت کل ملک بھر میں سانحہ صفورا چورنگی میں جاں بحق افراد کی یاد میں شمعیں روشن کی جائیں گی ، اعلامیہ
اسماعیلی کمیونٹی سے اظہاریکجہتی کیلئے صوبہ سندھ پنجاب، بلوچستان اور خیبرپختونخوا کے علاوہ آزادکشمیراور گلگت بلتستان میں بھی تعزیتی اجتماعات منعقد کیے جائیں گے، ایم کیوایم
ایم کیوایم نے سانحہ صفورا چورنگی پر کل بروز جمعرات یوم سوگ کا اعلان کیا ہے،اعلامیہ ایم کیوایم
کراچی ۔۔۔13، مئی2015ء
متحدہ قومی موومنٹ کے تحت کل بروز جمعرات کو یوم سوگ کے سلسلے میں اسماعیلی کمیونٹی سے اظہاریکجہتی کیلئے ملک بھر میں تعزیتی اجتماعات منعقد کیے جائیں گے اورسانحہ صفورا چورنگی میں جاں بحق ہونے والے افرادکی یاد میں شمعیں روشن کی جائیں گی ۔ یہ تعزیتی اجتماعات صوبہ سندھ ، صوبہ پنجاب، صوبہ بلوچستان اورصوبہ خیبرپختونخوا کے علاوہ آزادکشمیراور گلگت بلتستان میں بھی منعقد کیے جائیں گے اور جاں بحق ہونے والے افرادکے سوگوارلواحقین سے اظہاریکجہتی کیاجائے گا ۔ واضح رہے کہ کراچی کے علاقے صفورا چورنگی کے قریب مسلح دہشت گردوں نے بس میں گھس کر اندھادھند فائرنگ کرکے اسماعیلی کمیونٹی کے 45 افراد کوہلاک اور متعدد افراد کو شدیدزخمی کردیاہے اور اس المناک واقعہ پر ایم کیوایم کی جانب سے کل بروز جمعرات کو یوم سوگ کا اعلان کیا گیا ہے۔