حق پرست خواتین اراکین قومی اسمبلی نے لوئر دیر کے حلقہ پی کے 95کے ضمنی انتخاب میں خواتین کوحق رائے دہی کے استعمال سے روکنے کے خلاف قومی اسمبلی سیکریٹریٹ میں مذمتی قرار داد جمع کرادی ہے
خواتین کو حق رائے دہی سے روکنے کا عمل ہیومن رائٹس کی خلاف ورزی کے زمرے میں آتا ہے اور یہ پاکستان کے آئین کے بھی خلاف ہے ، مذمتی قرار داد
اسلام آباد۔۔۔11، مئی 2015ء
متحدہ قومی موومنٹ کی خواتین اراکین قومی اسمبلی نے لوئر دیر کے حلقہ پی کے 95میں خواتین کوحق رائے دہی کے استعمال سے روکنے کے خلاف قومی اسمبلی سیکریٹریٹ میں مذمتی قرار داد جمع کرادی ہے ۔ یہ قرار داد حق پرست اراکین قومی اسمبلی محترمہ کشور زہرا ، محترمہ سمن جعفری ، محترمہ نگہت مرزا حنا اور ڈاکٹر فوزیہ حمیدنے جمع کرائی ۔قرار داد میں کہا گیا ہے کہ خواتین کو حق رائے دہی سے روکنے کا عمل ہیومن رائٹس کی خلاف ورزی کے زمرے میں آتا ہے اور یہ پاکستان کے آئین کے بھی خلاف ہے ۔ واضح رہے کہ پی کے 95کے ضمنی انتخاب میں خواتین کو حق رائے دہی کے استعمال سے روکنے کے خلاف قرار داد قومی اسمبلی سیکریٹریٹ میں سب سے پہلے حق پرست خواتین اراکین قومی اسمبلی کی جانب سے جمع کرائی گئی ہے ۔