خورشیدشاہ کے ہوتے ہوئے پیپلزپارٹی اورآصف زرداری کوکسی دشمن کی ضرورت نہیں ہے۔رشیدگوڈیل

کراچی ۔۔۔ 9 مئی 2015ء

قومی اسمبلی میں ایم کیوایم کے پارلیمانی لیڈررشیدگوڈیل نے قائدتحریک الطاف حسین کے خلاف پیپلزپارٹی کے رہنمااوراپوزیشن لیڈر خورشیدشاہ کے بیان پرتبصرہ کرتے ہوئے کہاہے کہ قائدتحریک الطاف حسین کی سیاست توپاکستان کے استحکام اوراسے وڈیروں سے نجات دلانے کی سیاست ہے البتہ پاکستان کے دولخت ہونے کے ذمہ داروں میں کس جماعت کے سربراہ کانام لیاجاتاہے اس سے ہرکوئی واقف ہے ۔اپنے بیان میں رشیدگوڈیل نے کہاکہ خورشید شاہ آج صر ف ایم کیوایم کی وجہ سے اپوزیشن لیڈرہیں،سینیٹ میں ان کی جماعت کاچیئرمین بھی محض ایم کیوایم کی حمایت کی وجہ سے منتخب ہواہے لیکن ایم کیوایم کااحسان مندہونے کے بجائے خورشیدشاہ اپنی روایتی احسان فراموشی کامظاہرہ کرتے ہوئے قائدتحریک الطاف حسین اورایم کیوایم کے خلاف ہرزہ سرائی کررہے ہیں۔ رشیدگوڈیل نے کہاکہ معنی خیزبات یہ ہے کہ سابق وزیرداخلہ ذالفقارمرزا پی پی پی کے شریک چیئرپرسن اورسابق صدرمملکت آصف زرداری کے خلاف سنگین الزامات لگارہے ہیں اورپی پی پی اوراس کی قیادت کوملکی وعالمی سطح پر بدنام کررہے ہیں لیکن خورشیدشاہ نے ان بیانات پر مکمل طور پر چپ سادھ رکھی ہے اس کے برعکس ایم کیوایم تنقیدکانشانہ بنارہے ہیں ۔ خورشیدشاہ کے ہوتے ہوئے پیپلزپارٹی اور آصف زرداری کوکسی دشمن کی ضرورت نہیں ہے۔نہوں نے کہاکہ جب چیئرمین سینیٹ کے الیکشن کے موقع پر ایم کیوایم کی حمایت کی ضرورت ہوتی ہے اس وقت ایم کیوایم اوراس کی سیاست اچھی ہوتی ہے لیکن مطلب نکل جانے کے بعدوہی ایم کیوایم بری لگنے لگتی ہے۔ رشیدگوڈیل نے کہاکہ اگرخورشیدشاہ کو قائدتحریک الطاف حسین کی سیاست پر اعتراض ہے تو انہیں چاہیے کہ وہ چیئرمین سینیٹ کوان کے عہدے سے استعفیٰ د لوادیں کیونکہ وہ ایم کیوایم کے ارکان کے ووٹوں ہی سے سینیٹ کے چیئرمین منتخب ہوئے ہیں۔