متحدہ قومی موومنٹ کی عارضی رابطہ کمیٹی میں پانچ اراکین کا مزید اضافہ

کراچی ۔۔۔23،مئی 2013ء

متحدہ قومی موومنٹ کی عارضی رابطہ کمیٹی میں مزید 5اراکین کا اضافہ کردیا گیا ہے۔ ایم کیوایم کے اعلامئیے کے مطابق تحلیل شدہ رابطہ کمیٹی اور مختلف شعبہ جات کے ذمہ داران کے اجلاس سے گفتگو میں جناب الطاف حسین نے عارضی رابطہ کمیٹی میں پورے ملک کی نمائندگی کیلئے مزید پانچ ارکان کو شامل کرنے کااعلان کیا ہے۔ اس طرح عارضی رابطہ کمیٹی کے ارکان کی تعداد 12 ہوگئی ہے ۔ واضح رہے کہ تنظیمی معاملات کی نگرانی کیلئے عارضی طور پرسات رکنی کمیٹی تشکیل دی گئی تھی جس میں ڈاکٹر فاروق ستار، ڈاکٹر خالد مقبول صدیقی، عامر خان، ڈاکٹر نصرت،  ڈاکٹر صغیراحمد، کنورنوید اور سیف یار خان شامل تھے۔ ایم کیوایم کی عارضی رابطہ کمیٹی میں شامل کئے جانے والوں میں محمد اشفاق منگی، گلفرازخان خٹک، یوسف شاہوانی،افتخار رندھاوا اور محترمہ ممتازانوار شامل ہیں۔