جناب الطا ف حسین کی میٹر وپولیٹن پولیس کی جانب سے جولائی 2015ء تک ضمانت میں توسیع پر جناح گراؤنڈ عزیز آباد میں زبردست جشن منایا گیا

کراچی ۔۔۔14،اپریل 2015ء 

لندن میں منی لانڈرنگ کے الزام میں ایم کیوایم کے قائد جناب الطا ف حسین کی میٹر وپولیٹن پولیس کی جانب سے جولائی 2015ء تک ضمانت میں توسیع پر جناح گراؤنڈ عزیز آباد میں زبردست جشن منایا گیا اور جناب الطاف حسین کی ضمانت میں توسیع پر ملک بھر میں کارکنان اور عوام نے ایک دوسرے سے مبارکباد کا تبادلہ کیا جبکہ ایم کیوایم کے دفاتر سمیت مختلف مقامات پر لوگوں نے مٹھائیاں تقسیم کیں۔تفصیلات کے مطابق جناب الطاف حسین نے منی لانڈرنگ کے الزام میں اپنی ضمانت میں توسیع کے بعد جناح گراؤنڈ عزیز آباد میں جناب الطاف حسین کو ضمانت میں توسیع پر مبارکباد دینے کیلئے جمع ہونے والے اجتماع کے شرکاء سے ویڈیو لنک کے ذریعے خطاب کیا ۔ اجتماع میں نوجوانوں ، بزرگوں ،خواتین ، بچوں سمیت مختلف شعبہ ہائے زندگی سے تعلق رکھنے والے افراد نے ہزاروں کی تعداد میں شرکت کی اور جناب الطاف حسین کے حق میں فلک شگاف نعرے لگائے اور انہیں ضمانت میں رہائی پر دلی مبارکباد پیش کی ۔اس موقع پر ایم کیوایم کی رابطہ کمیٹی کے اراکین ، حق پرست سینیٹر ، اراکین قومی وصوبائی اسمبلی بھی موجود تھے ۔ جناب الطاف حسین کا خطاب ایم کیوایم ویب ٹی وی پر بھی براہِ راست دکھایا گیا ۔جناب الطاف حسین کے خطاب کے بعد جناح گراؤنڈ عزیز آباد میں وارئٹی شو منعقد ہوا جس میں ملک کے مشہو ر و معروف فنکاروں نے اپنے فن کا مظاہرہ کیا ۔ وارئٹی پروگرام کے شرکاء رات گئے تک محظوظ ہوتے رہے ۔جناب الطا ف حسین کی ضمانت میں توسیع پر ایم کیوایم کے مرکز نائن زیرو عزیز آباد ، ایم پی اے ہاسٹل خورشید بیگم سیکریٹریٹ اور اطراف کی گلیوں کو برقی قمقموں سے سجایا گیا ہے ۔ ایم کیوایم کے کارکنان و عوام کی جانب سے ایم کیوایم کے مرکز نائن زیرو عزیز آباد اور انٹرنیشنل سیکریٹریٹ لندن میں جناب الطا ف حسین کی ضمانت میں توسیع کی اطلاع ملتے ہی فیکس ، ٹیلی فون اورای میل پر مبارکباد کے پیغامات کا تانتا بندھ بن گیا ۔