حلقہ این اے 246غریبوں اور محنت کشوں کا حلقہ ہے اور یہاں کے عوام کو لاتعداد پریشانیوں کا سامنا ہے ،کنور نوید جمیل

کراچی۔۔۔۔14اپریل2015ء

این اے 246کے لئے نامزد حق پرست امیدوار کنور نوید جمیل نے موسی ٰ کالونی اور لیاقت آبادمیں انتخابی مہم کے سلسلے میں کارنرمیٹنگز سے خطاب کرتے ہوئے کہا ہے کہ حلقہ این اے 246غریبوں اور محنت کشوں کا حلقہ ہے اور یہاں کے عوام کو لاتعداد پریشانیوں کا سامنا ہے ، اس علاقے میں بڑی تعداد بنگالی اور برمی طبقے سے تعلق رکھنے والے پاکستانیوں کی ہے لیکن انہیں پاکستانی تسلیم نہیں کیا جاتا اور یہی وجہ ہے کہ یہاں لوگوں کو شناختی کارڈ بنانے میں بھی سخت مشکلات کا سامنہ کرنا پڑتا ہے۔انہوں نے کہا کہ جناب الطاف حسین نے مجھے خصوصی ہدایت کی ہے کہ میں ہر لمحہ اپنے حلقے کے عوام کے درمیان رہوں اور جس پہر عوام کو میری مد د کی ضرورت ہو میں انہیں مدد فراہم کروں ۔ انہوں نے کہا کہ مہاجروں نے ہمیشہ قلم و کتاب کی سیاست کی ہے ، مہاجروں پر ہر دور میں مظالم ڈھائے گئے لیکن ان پر ہونیوالے کسی ظلم کی جے آئی ٹی رپورٹ آج تک عوام کے سامنے نہیں لائی گئی ،گزشتہ روز بھی جماعت اسلامی کے سربراہ سراج الحق نے اشتعال انگیزی پر مبنی تقریر کی ۔انہوں نے کہا کہ ملک پر 67 برس سے قابض اشرافیا ء نے کبھی ہمیں ایک قوم بننے نہیں دیا ،ایم کیو ایم نے سندھ میں کرمنلز کے خلاف آپریشن کی حمایت کی لیکن ایک مرتبہ پھر آپریشن کا رخ ہماری جانب موڑ دیا گیا اور کراچی آپریشن کے دوران سینکڑوں کارکنان و ہمدردوں کو شہید کیا گیا لیکن آج تک ان کا قاتل گرفتار نہیں کیا جاسکا۔کنور نوید جمیل نے کہا کہ جماعت اسلامی نے ہمیشہ گولی اور گالی کی سیاست کی ہے اور اسی ذہنیت کے لو گ کراچی میں امن قائم نہیں ہونے دیتے ۔اس موقع پر حق پرست اراکین اسمبلی سید آصف حسنین ،وقار حسین شاہ ، سفیان یوسف ،وسیم قریشی ، انور عالم اور علاقہ معززین سمیت خواتین ، بچوں ، بزرگوں ، نوجوانوں ، طالبعلموں کی بڑی تعداد کارنر میٹنگ میں شریک تھی ۔ اس موقع پر حق پرست ارکان اسمبلی نے بھی کارنر میٹنگز سے خطاب کیا اور عوام سے اپیل کی کہ وہ 23اپریل کو ہونیوالے ضمنی انتخابات میں گھروں سے بھر پور تعداد میں نکل کر پولنگ بوتھ آئیں اور پتنگ پر بڑی تعداد میں مہر لگا کر جناب الطاف حسین کے نامزد حق پرست امیدوار کنور نوید جمیل کو بھاری اکثریت سے کامیاب کروائیں ۔