انتخابی عمل کے دوران ایم کیوایم کے کارکنوں کی شہادت اورکارکنان کے مسلسل قتل کے خلاف کل بروز جمعہ کو سندھ بھر میں یوم سوگ منایا جائے گا ، رابطہ کمیٹی کا اعلان

کراچی ۔۔۔25، اپریل 2013ء

متحدہ قومی موومنٹ کی رابطہ کمیٹی نے نصرت بھٹوکالونی، نارتھ ناظم آبادمیں ایم کیوایم کے بندانتخابی دفترکے قریب انتخابی سرگرمیوں میں مصروف عمل ایم کیو ایم کے 5کارکنان کی شہادت اورمتعدد کارکنوں وہمدردوں کے زخمی ہونے اور دہشت گردوں کے ہاتھوں ایم کیوایم کے ذمہ داروں اور کارکنوں کے تسلسل کے ساتھ ہونے والے قتل کے واقعات کے پیش نظر کل بروزجمعہ پورے سندھ میں ’’یوم سوگ‘‘ منانے کا اعلان کیا ہے ۔ ایک بیان میں رابطہ کمیٹی نے سندھ بھر کے حق پرست عوام ، تاجروں ، ٹرانسپورٹرزاور زندگی کے دیگر شعبوں سے تعلق رکھنے والے افراد سے اپیل کی ہے کہ وہ ایم کیوایم کے بے گناہ کارکنان کے مسلسل قتل اوردہشت گردی کے واقعات کے خلاف پرامن احتجاج کریں اور کل بروزجمعہ سندھ بھر میں تمام تر کاروبارزندگی بشمول ٹرانسپورٹ معطل کرکے دہشت گردوں پر یہ واضح کردیں کہ ان کے بزدلانہ حملوں کے خلاف پوری قوم مکمل طور پر متحد ہے۔

رابطہ کمیٹی نے صوبہ پنجاب ، خیبرپختونخوا،بلوچستان ،گلگت بلتستان اورآزادکشمیرکے کارکنان وعوام سے اپیل کی کہ وہ اپنے اپنے علاقوں میں ایم کیوایم کے کارکنوں کے مسلسل قتل کے خلاف کل بروزجمعہ احتجاجی اجلاس منعقد کریں، دفاتر پر سیاہ جھنڈے لگائیں،ایم کیوایم کے شہداء کے ایصال ثواب کیلئے قرآن خوانی کے اجتماعات منعقد کریں اور حق پرست شہداء کو خراج عقیدت پیش کریں۔