ڈاکٹر خالد مقبول صدیقی کی سربراہی میں قومی اسمبلی میں حق پرست پارلیمانی لیڈر رشید گوڈیل ، حق پرست سینیٹر و صدر پنجاب ایم کیوایم میاں عتیق نے آج قومی اسمبلی کے دفتر میں وفاقی وزیر اطلاعات و نشریات پرویز رشید سے ملاقات
ایم کیوایم نے وفد نے پرویز رشید کو ایم کیوایم کے خلاف میڈیا ٹرائل اور جناب الطاف حسین کے خلاف ہتک آمیز جملے اور الفاظ استعمال کئے جانے کے بیہودہ عمل سے آگاہ کیا
ٹی وی چینل پر کسی بھی سیاسی جماعت کے خلاف یکطرفہ ایکشن نہیں ہونے دیاجائے گا جس بھی ٹی وی چینل اور پروگرام میں میڈیا ٹرائل کا عنصر نمایاں ہوگا ان کے خلاف قانونی کارروائی کی جائے گی ، وفاقی وزیر کی ایم کیوایم کے وفد کو یقین دہانی
اسلام آباد۔۔۔25، مارچ2015ء
متحدہ قومی موومنٹ کی رابطہ کمیٹی کے رکن ڈاکٹر خالد مقبول صدیقی کی سربراہی میں قومی اسمبلی میں حق پرست پارلیمانی لیڈر رشید گوڈیل ، حق پرست سینیٹر و صدر پنجاب ایم کیوایم میاں عتیق نے آج قومی اسمبلی کے دفتر میں وفاقی وزیر اطلاعات و نشریات پرویز رشید سے ملاقات کی اورانہیں ایم کیوایم کے خلاف میڈیا ٹرائل اور کروڑوں عوام کے قائد جناب الطا ف حسین کے خلاف ہتک آمیز جملے اور الفاظ استعمال کئے جانے کے بیہودہ عمل سے آگاہ کیا ۔ ایم کیوایم کے وفد نے وفاقی وزیر پرویز رشید کو بتایا کہ ایم کیوایم کے خلاف میڈیا ٹرائل پر عوام و کارکنان میں شدید غم وغصہ کی کیفیت پائی جارہی ہے اور میڈیا مکمل طور پر یکطرفہ کردار ادا کررہا ہے ۔ وفاقی وزیر پرویز رشید نے ایم کیوایم کے اعلیٰ سطحی وفد کی باتوں کوتوجہ سے سنا اور یہ یقین دلایا کہ ٹی وی چینل پر کسی بھی سیاسی جماعت کے خلاف یکطرفہ ایکشن نہیں ہونے دیاجائے گا جس بھی ٹی وی چینل اور پروگرام میں میڈیا ٹرائل کا عنصر نمایاں ہوگا ان کے خلاف قانونی کارروائی کی جائے گی ۔