برطانیہ میں ایم کیوایم کا یوتھ ونگ قائم کردیا گیا

لندن۔۔۔23، مارچ2015ء

متحدہ قومی موومنٹ کے تحت برطانیہ میں ایم کیوایم کا یوتھ ونگ قائم کردیا گیا ہے ۔ یوتھ ونگ کا قیام ایم کیوایم برطانیہ کے مرکزی دفتر میں ہونے والے ایک اجلاس میں کیا گیا جس میں برطانیہ کے مختلف تعلیمی اداروں کے طلبا وطالبات نے شرکت کی ۔

تفصیلات کے مطابق برطانیہ کے مختلف تعلیمی اداروں میں زیرتعلیم پاکستانی طلبا وطالبات میں ایم کیوایم کے فکروفلسفہ اور حق پرستانہ پیغام کے فروغ ، پاکستان سے فرسودہ جاگیردارانہ نظام کے خاتمے اور غریب ومتوسط طبقہ کی حکمرانی کیلئے قائد تحریک جناب الطاف حسین کی جدوجہد کو اجاگر کرنے کیلئے ا یم کیوایم یوکے یوتھ ونگ کا قیام عمل میں لایا گیا ہے اوراس سلسلے میں 8رکنی سینٹرل آرگنائزنگ کمیٹی تشکیل دیدی گئی ہے۔حبادانش ایم کیوایم یوکے یوتھ ونگ کی آرگنائز ر اور شمائم صدیقی جوائنٹ آرگنائزر ہوں گی جبکہ ایم کیوایم یوکے یوتھ ونگ کی سینٹرل آرگنائزنگ کمیٹی میں برطانیہ کی مختلف یونیورسٹیوں اور کالجوں میں زیرتعلیم طلباوطالبات شامل ہیں ۔ دریں اثناء یوتھ ونگ کے مرکزی عہدیداروں ، اراکین اور طلبا وطالبات کی بڑی تعداد نے ایم کیوایم انٹرنیشنل سیکریٹریٹ لندن میں ایم کیوایم کے قائد جناب الطاف حسین سے بھی گفتگو کی جس کے دوران جناب الطاف حسین نے ایم کیوایم کے فکروفلسفہ اور موجودہ حالات پر تفصیلی گفتگو کی ۔