ایم کیو ایم کے وفد کی آرام باغ برہانی مسجد کا دورہ اور انتظامیہ سے ملاقات
دھماکے میں شہید ہونے والے افراد کے اہلِ خانہ سے دلی تعزیت اور زخمیوں کی جلد صحتیابی کیلئے دعا گو ہیں،حق پرست اراکین سندھ اسمبلی
کراچی۔۔۔20مارچ 2015ء
متحدہ قومی موومنٹ کے قائد جناب الطاف حسین کی ہدایت حق پرست اراکین سندھ اسمبلی کے ایک وفد نے آج دوپہرآرام باغ برہانی مسجد کے باہر ہونے والے بم دھماکے کے جائے وقوع کا دورہ کیا اور مسجد انتظامیہ اور بوہری برادری سے تعلق رکھنے والے افراد سے ملاقات کی۔وفد میں سندھ اسمبلی میں حق پرست پارلیمانی لیڈر سید سردار احمد،ڈپٹی پارلیمانی لیڈر خواجہ اظہار الحسن ،اراکین اسمبلی محمد دلاور اور کامران فاروقی تھے ۔وفد نے برہانی مسجد انتظامیہ کے شبیر ماما و دیگر معززین سے ملاقات کرکے واقعہ کی تفصیلات معلو م کیں اور بم دھماکے میں شہید ہونے والے افراد کے لئے دلی تعزیت کااظہارکرتے ہوئے ان کی مغفرت اوربلنددرجات کے لئے فاتحہ خوانی کی۔ ۔اس موقع پرانہوں نے دھماکے زخمیوں سے اظہاریکجہتی کیااوران کی جلدومکمل صحت یابی کے لئے دعاکی۔بعدازاں خواجہ اظہار الحسن نے میڈیاکے نمائندوں سے گفتگومیں کہا کہ پاکستان میں دہشت گردی سے نبردآزماہونے کی ضرورت ہے ۔انہوں نے کہا کہ ہم جناب الطاف حسین کی جانب سے دلی تعزیت کرتے ہیں اور زخمی ہونے والے افراد کی جلد و مکمل صحتیابی کے لئے دعا گو ہیں۔