حق پرست اراکین اسمبلی اور انچارج اقلیتی امور کی چرچ آف پاکستان کے بشپ صادق ڈینئل اور کیتھولک سینٹ جانز چرچ کے فادر صالح ڈائگوعلیحدہ علیحدہ ملاقاتیں
وفد نے لاہور میں ہونے والے سانحہ پر شدید مذمت کی اورواقعے میں ہلاکتوں پر دلی افسوس کاا ظہار کیا
جناب الطاف حسین تمام مذاہب اور مسالک کے احترام کا درس دیتے ہیں ،وفد ایم کیو ایم
بشپ صادق ڈینئل اور فادر صالح ڈائگونے اظہار یکجہتی کرنے پر جناب الطاف حسین کا شکریہ ادا کیا
کراچی۔۔۔15مارچ2015ء
متحدہ قومی موومنٹ کے قائد جناب الطاف حسین کی ہدایت پر ایم کیو ایم کے حق پرست اراکین اسمبلی سینیٹر محمد علی سیف ،رکن قومی اسمبلی رشید گوڈیل نے انچارج اقلیتی امور سید منور الالسلام وا راکین کے ہمراہ لاہو ر کے علاقے یوحنا آباد چرچز میں خود کش بم دھماکوں میں ہونے والی ہلاکتوں پر اظہار افسوس کیا اور انکے ساتھ یکجہتی کے لئے چرچ آف پاکستان کے بشپ صادق ڈینئل سے بشپ ہاؤس اور ڈرگ روڈ کیتھولک سینٹ جانز چرچ کے فادر صالح ڈائگوسے علیحدہ علیحدہ ملاقاتیں کیں او ر انہیں قائد تحریک جناب الطاف حسین کی جانب سے یکجہتی کا پیغام پہنچایا ۔ ایم کیو ایم کے وفد نے گفتگو کرتے ہوئے کہا کہ جناب الطاف حسین تمام مذاہب اور مسالک کے احترام کا درس دیتے ہیں اور انکایہی پیغام ہے کہ تمام پاکستانیوں کو برابر کا شہری سمجھا جائے اور انکی عبادت گاہوں کی حفاظت کے لئے عملی اقدمات کئے جائیں۔انہوں نے کہاکہ ایم کیو ایم لاہور میں ہونے والے سانحہ کی بھر پور انداز میں مذمت کرتی ہے اور حکومت سے مطالبہ کرتی ہے کہ اس دہشت گردی اور بربریت میں ملوث عناصر کو عبرت کا نشان بنائے تاکہ کسی میں اتنی جرات نہ ہو کہ کسی کی عبادت گاہ کی طرف میلی آنکھ سے دیکھے۔ بشپ صادق ڈینئل اور فادر صالح ڈائگونے جناب الطاف حسین کا شکریہ ادا کیا اور کہا کہ ہمیشہ کی طرح اس مرتبہ بھی ایم کیو ایم نے سب سے پہلے دکھ کی اس گھڑی میں ہمیں یاد رکھا اور آواز حق بلند کی۔