نائن زیرو پر غیر قانونی چھاپہ مار کارروائی کے دوران رینجرز اہلکار متعدد اہل محلہ کو بھی بلاجواز گرفتار کرکے اپنے ہمراہ لے گئے

کراچی ۔۔۔12، مارچ2015ء 

منگل کی علی الصبح ایم کیوایم کے مرکز نائن زیرو عزیز آباد اور مرکزی دفتر پر رینجرز نے غیر قانونی چھاپہ مار کارروائی کے دوران روز مرہ ضروری کاموں کی ادائیگی کے سلسلے میں گھروں سے نکلنے والے متعدد اہل محلہ کو بھی گرفتار کرلیا جو ابھی تک رینجرز کی غیر قانونی تحویل میں ہیں ۔ نائن زیرو پر چھاپہ مار کارروائی کے دوران عزیز آباد کے مستقل رہائشی افراد کی بلاجواز گرفتاریوں پر اہل محلہ میں گہری تشویش اور غم و غصہ کی لہر پائی جاتی ہے ۔ رینجرز کی چھاپہ مار کارروائی کے بعد اہل محلہ کی بڑی تعداد نے ایم کیوایم کے مرکزی دفتر میں ذمہ داران سے رابطہ کیا اور اپنے عزیز و اقارب کی گرفتاریوں کی تفصیلات سے آگاہ کیا ۔

دریں اثناء متحدہ قومی موومنٹ کی رابطہ کمیٹی نے نائن زیرو پر چھاپہ مار کارروائی کے دوران رینجرز کی جانب سے عزیز آباد کے رہائشی مستقل افراد کی بلاجواز گرفتاریوں کی سخت ترین الفاظ میں مذمت کی ہے ۔ ایک بیان میں رابطہ کمیٹی نے کہاکہ نائن زیرو پر چھاپہ مار کارروائی کے بعد محلے کے وہ افراد جو نماز پڑھنے جارہے تھے اور علی الصبح چہل قدمی اور روز مرہ کے معمولات کی انجام دہی کیلئے نکلے تھے انہیں بھی رینجرز اہلکاروں کی جانب سے بلاجواز گرفتارکرنا اور ہتک آمیز سلوک کا نشانہ بنانا افسوسناک امر ہے ۔ رابطہ کمیٹی نے کہاکہ عزیز آباد کے رہائشی افراد کی بلاجواز گرفتاریوں پر ان کے اہل خانہ سخت تشویش میں مبتلا ہیں اور اپنے عزیز و اقارب کی تلاش میں مارے مارے پھر رہے ہیں لیکن ان کا کوئی پرسان نہیں ہے ۔رابطہ کمیٹی نے کہاکہ ایم کیوایم کے مرکز نائن زیرو کے جو رہائشی افراد گرفتار کئے گئے ہیں وہ ایم کیوایم کے کارکنان بھی نہیں ہیں اور انہیں بلاجواز حراست میں رکھنا اہل محلہ ذہنی کوفت اور اذیت میں مبتلا کرنے کے مترادف ہے ۔رابطہ کمیٹی نے وزیراعظم نواز شریف ، وفاقی وزیر داخلہ چوہدری نثار علی خان ، گورنر سندھ ڈاکٹر عشرت العباد اور وزیراعلیٰ سندھ سید قائم علی شاہ سے مطالبہ کیا کہ رینجرز کی نائن زیرو پر غیرقانونی چھاپہ مار کاروائی کے دوران بلاجواز گرفتار کئے گئے اہل محلہ کو فی الفور رہا کیاجائے اور ان کی رہائی کے سلسلے میں تمام قانون کارروائی ، تقاضے اور ضابطے جلد مکمل کئے جائیں ۔