رینجرزکا نائن زیروکے قریب رہائش پذیر ایم کیوایم کے قائد الطا ف حسین کی بڑی ہمشیرہ سائرہ بیگم کے گھرپر بھی چھاپہ،تلاشی کے نام پر توڑپھوڑ

کراچی ۔۔۔ 11 مارچ 2015ء

رینجرزنے نائن زیروکے قریب رہائش پذیرمتحدہ قومی موومنٹ کے قائدجناب الطا ف حسین کی بڑی ہمشیرہ سائرہ بیگم کے گھرپر بھی چھاپہ مارا اورتلاشی کے نام پر توڑپھوڑ کی ۔ جناب الطاف حسین کے 9 بہن بھائی ہیں جن میں سائرہ بیگم سے بڑی ہیں اوربیوہ ہیں۔ ان کے شوہر محمداسلم ابراہانی کو1995ء میں گرفتارکرکے کئی روزتک تشددکانشانہ بنایاگیاتھااور چھ ماہ تک اڈیالہ جیل میں رکھ بھی تشدد کانشانہ بنایاگیا۔ چھ ماہ بعدرہائی پانے کے بعدوہ بھی خالق حقیقی سے جاملے تھے۔ جناب الطا ف حسین کی ہمشیرہ 68سالہ سائرہ اسلم نائن زیرو کے قریب ایک مکان میں بیوگی کی تنہازندگی گزاررہی ہیں اورشوگراورمختلف امراض میں مبتلاہیں۔ ان کے گھرپر چھاپہ ماراگیااوراس وقت بھی رینجرزکی بھاری نفری موجود ہے اورایک ایک کمرے اورالماری کی تلاشی لے رہی ہے ۔ 

جناب الطاف حسین نے نائن زیرو اوراس کے اطراف میں گھروں پر چھاپوں،تلاشی اوربے گناہ کارکنوں اورذمہ داروں کی گرفتاریوں کی شدید مذمت کرتے ہوئے اسے سراسرظلم قرار دیا۔انہوں نے کہاکہ رینجرزکے اعلیٰ حکام کویہ نہیں بھولناچاہیے کہ ان کی بھی ماں بہنیں ہیں، اگرخدانخواستہ سائر اسلم کوکچھ ہوا تواس کی تمام ترذمہ داری رینجرزپر عائدہوگی۔ جناب الطاف حسین نے کہاکہ نائن زیرو، میری بہن اوردیگر کارکنوں کے گھروں پر تلاشی کے نام پر دہشت گردی کے عمل کوفی الفوررکوایاجائے۔جناب الطاف حسین نے کہاکہ جہاں تک رینجرزکے الزامات کاتعلق ہے تواس کے بارے میں تمام ترتفصیلات سے جلد ہی آگاہ کیاجائے گا۔ جناب الطاف حسین نے عوام سے اپیل کی کہ وہ اپنے جذبات قابومیں رکھیں اورپرامن رہیں۔