ایم کیوایم کی رابطہ کمیٹی نے ARY کے بائیکاٹ کا فیصلہ واپس لینے کا اعلان کردیا

لندن 26۔۔۔فروری 2015ء

متحدہ قومی موومنٹ کے قائد جناب الطاف حسین نے رابطہ کمیٹی کے سینئر ڈپٹی کنوینر ندیم نصرت کو ہدایت کی ہے کہ وہ فی ا لفور رابطہ کمیٹی پاکستان اور لند ن کے اراکین کا مشترکہ ہنگامی بنیاد پر اجلاس کریں اور ایک نجی ٹیلی ویثرن اے آر وائی کے بائیکاٹ کے فیصلے کو فی الفور واپس لینے پر غورکریں اورتمام اختلافات وا عتراضات مقامی ٹیلی ویثرن کے ذمہ داران سے بات چیت کے ذریعہ حل کریں ۔جناب الطاف حسین نے کہا کہ ہم کسی بھی اینکر پرسنز یاٹی وی چینل سے ذاتی اختلاف نہیں رکھتے اورساتھ ساتھ اینکر پرسنز سے بھی دردمندانہ درخواست کرتے ہیں کہ وہ اپنے پروگراموں میں آداب صحافت کا خیال رکھتے ہوئے شائستہ الفاظوں کا استعمال کریں،کسی بھی جماعت یا رہنماء کی کردار کشی نہ کریں، غیر جانبدارانہ رپورٹنگ کریں اور غیر جانبدارنہ حمایت یا تنقید کا عمل صحافتی اصولوں کے مطابق کر یں۔

دریں اثناء جناب الطاف حسین کی ہدایت پر رات دیر گئے تک ایم کیوایم کی رابطہ کمیٹی کا مشترکہ اجلاس جاری رہا جس کے بعدرابطہ کمیٹی کے سینئر ڈپٹی کنوینر ندیم نصرت نے رابطہ کمیٹی کے متفقہ فیصلے کے مطابق ARYکے بائیکاٹ کافیصلہ واپس لینے کا اعلان کیاہے۔ ARYکے بائیکاٹ کے فیصلے کے خاتمے کے اعلان کی توثیق ایم کیوایم کے قائدجناب الطاف حسین بھی کر دی ہے ۔ مزید برآں جناب الطاف حسین کی توثیق کے بعد رابطہ کمیٹی نے جمعرات کو پاکستان بھر کے پریس کلب کے سامنےARY کے خلاف ہونے والے احتجاجی مظاہروں کی منسوخی کا بھی اعلان کیا ہے ۔