جناب الطاف حسین نے محروم و مظلوم عوام کیلئے جہد مسلسل میں کبھی باطل قوتوں کے آگے سر نہیں جھکایا، عارف خان ایڈوکیٹ

ایم کیوایم رابطہ کمیٹی کے رکن عارف خان ایڈوکیٹ کا ایلڈرز ونگ کے تربیتی اجلاس سے خطاب

کراچی ۔۔۔22فروری2015ء

متحدہ قومی موومنٹ کی رابطہ کمیٹی کے رکن عارف خان ایڈوکیٹ نے کہا ہے کہ جناب الطاف حسین نے اپنی جہد مسلسل کے تمام عرصے میں ملک کے محروم و مظلوم عوام کو انکے حقوق دلانے کی جدوجہد کی ہے اور اس جہد مسلسل میں انہوں نے کبھی باطل قوتوں کے آگے سر نہیں جھکایا ۔ان خیالات کا اظہار انہوں نے اتوار کی شام لال قلعہ گراؤنڈ میں منعقدہ ایم کیوا یم ایلڈرز ونگ کی تر بیتی اجلاس سے خطاب کرتے ہوئے کیا ۔ اس موقع پر ایم کیو ایم کے سینئر رہنما و جوائنٹ انچارج متحدہ سوشل فورم احمد سلیم صدیقی اور ایلڈرز ونگ کمیٹی کے انچارج نے بھی اظہار خیال کیا ۔ اجلاس سے خطاب کرتے ہوئے عارف خان ایڈوکیٹ نے کہا کہ جناب الطاف حسین نے کبھی اپنے کسی رشتہ دار یا گھر کے کسی فرد کو ملک کے اعلیٰ ایوانوں میں نہیں بھیجا بلکہ ہمیشہ ملک کے باشعور و تعلیم یافتہ غریب نوجوان کو اسمبلیوں میں بھیجا ہے ۔انہوں نے کہا کہ یہ جناب الطاف حسین کے نظریے اور فلسفہ کی سچائی کا ثبوت ہے کہ ایک چھت کے نیچے ملک کی تمام زبانوں ، علاقوں ، قصبوں ، مذاہب اور رنگ و نسل کے افراد موجود ہیں اور ملک کی ترقی و فلاح کیلئے اپنا بھر پور کردار ادا کررہے ہیں ۔انہوں نے ایلڈرز ونگ کے کارکنان کو ہدایت کی کہ وہ اپنی نئی نسل کو تحریک کے بنیادی مقاصد اور ملک میں غریبوں کی فلاح و بہبود،پاکستان کی تعمیر و ترقی اور ملک میں بھائی چارگی کے فروغ کیلئے جناب الطاف حسین کے کلیدی کردار سے آگاہ کریں تاکہ آئندہ نسل بھی پاکستان کی ترقی و شادابی کیلئے اپناکردار اداکرسکے۔اس موقع پر ایم کیو ایم لیگل ایڈکمیٹی کے مرکزی ذمہ داران ، مختلف سیکٹرز او ر یونٹس سے تعلق رکھنے والے ایلڈ ز کے کارکنان کی بڑی تعدا د اجلاس میں شریک تھی۔