ایم کیوایم کے قائد الطاف حسین اور سابق وفاقی وزیرداخلہ سینیٹررحمن ملک کے مابین فون پر گفتگو

لندن۔۔۔21، فروری2015ء

متحدہ قومی موومنٹ کے قائد جناب الطاف حسین اورپاکستان پیپلزپارٹی کے رہنمااورسابق وفاقی وزیرداخلہ سینیٹررحمن ملک کے مابین فون پر گفتگوہوئی۔ دونوں رہنماؤں نے سیاسی صورتحال، پاکستان میں دہشت گردی کے بڑھتے ہوئے واقعات اورملک کی مجموعی صورتحال پر تبادلہ خیال کیا۔ دونوں رہنماؤں نے پاکستان کے مختلف شہروں میں امام بارگاہوں،پولیس ہیڈکوارٹرز، اسکولوں اوردیگر مقامات پر دہشت گردوں کے حملوں کی شدیدالفاظ میں مذمت کی اوران واقعات میں پولیس اہلکاروں اورشہریوں سمیت متعددافراد کے جاں بحق ہونے پر افسوس کااظہارکیا۔ گفتگومیں اس امرپراتفاق کیاگیاکہ پاکستان اورافغانستان دونوں ہی دہشت گردی کاشکار ہیں لہٰذا افغانستان کی حکومت کودہشت گردی کے خاتمہ کے لئے پاکستان کاقدم قدم پر ساتھ دیناچاہیے تاکہ دہشت گردی کے خلاف جنگ کامیابی سے ہمکنارہواور دونوں ممالک دہشت گردی سے نجات حاصل کرسکیں۔ جناب الطاف حسین اوررحمن ملک نے پاکستان میں دہشت گردوں کے خلاف پاک فوج کے جراتمندانہ ایکشن کوسراہتے ہوئے کہاکہ پاک فوج اوردیگرعسکری ادارے ملک کودہشت گردی کی لعنت سے نجات دلانے کیلئے جس جرات اوربہادری سے کارروائی کررہے ہیں وہ قابل تحسین ہے ۔ انہوں نے دہشت گردوں کے خلاف کارروائیوں میں اپنی جانوں کے نذرانہ پیش کرنے والے پاک فوج ، ایف سی اورپولیس کے افسروں اورجوانوں کوخراج عقیدت پیش کیااوران کے درجات کی بلندی کیلئے دعاکی۔
وڈیو