ایم کیوا یم رابطہ کمیٹی کی حیدری مارکیٹ کے نزدیک تاجر کریم ہاشوانی اور انکے ڈرائیور کے قتل کی سخت الفاظ میں مذمت
دہشت گردملک کی معیشت کو نقصان پہنچانے کیلئے سوچے سمجھے منصوبے کے تحت تاجر برادری کو نشانہ بنا رہے ہیں، رابطہ کمیٹی
کراچی کی معیشت کا نقصان صرف شہر کیلئے نہیں بلکہ پاکستان کیلئے معاشی انتشارکا سبب بن سکتاہے ، رابطہ کمیٹی
وزیر اعظم میاں محمد نواز شریف، وفاقی وزیر داخلہ ، گورنر اور وزیر اعلیٰ سندھ کراچی کی معیشت کے خلاف سازش بے نقاب کرنے کیلئے اقدامات کریں، ایم کیوا یم رابطہ کمیٹی کا مطالبہ
کراچی۔۔۔۔18فروری2015ء
متحدہ قومی موومنٹ کی رابطہ کمیٹی نے کراچی کے علاقے حیدری مارکیٹ کے نزدیک نامعلوم مسلح دہشت گردوں کی فائرنگ کے نتیجے میں تاجر کریم ہاشوانی اور انکے ڈرائیور کے قتل کی سخت الفاظ میں مذمت کی ہے ۔ایک بیان میں رابطہ کمیٹی نے کہا کہ دہشت گردشہر کی معیشت کو نقصان پہنچانے کیلئے سوچے سمجھے منصوبے کے تحت تاجر برادری کو نشانہ بنا رہے ہیں ۔انہوں نے کہا کہ کریم ہاشوانی کا قتل محض ٹارگٹ کلنگ نہیں بلکہ کراچی کی معیشت پرکاری ضرب لگانے کی سنگین سازش کا حصہ ہے لیکن کراچی کے باشعور شہری اور انکی جماعت ایم کیوا یم شہر میں امن خراب کرنے کی کسی بھی سازش کو اپنے اتحاد سے ناکا م بنادے گی ۔ انہوں نے کہا کہ کراچی کی معیشت کا نقصان صرف شہر کیلئے نہیں بلکہ پاکستان کیلئے معاشی انتشارکا سبب بن سکتاہے ۔ رابطہ کمیٹی نے وزیر اعظم میاں محمد نواز شریف، وفاقی وزیر داخلہ چوہدری نثار علی خان ،گورنر سندھ اور وزیر اعلیٰ سندھ سے مطالبہ کیا ہے کہ وہ کریم ہاشوانی کے قتل کا سختی سے نوٹس لیکر شہر کی معیشت کو تباہ کرنے کی سازش کو بے نقاب کریں اور ان سازشی عناصر کو قانون کے مطابق سخت سے سخت سزا دیں ۔رابطہ کمیٹی نے کریم ہاشوانی اور انکے ڈرائیورکے سوگوار لواحقین سے دلی ہمدردی کا اظہار کرتے ہوئے شہداء اور انکے پسماندگان کیلئے دعا کی ہے۔