جیکب آباد میں نورواہ کے قریب خوشحال خان خٹک ایکسپریس میں بم دھماکہ پر ایم کیوایم رابطہ کمیٹی کااظہار مذمت

کراچی ۔۔۔12 ،فروری 2015ء 

متحدہ قومی موومنٹ کی رابطہ کمیٹی نے جیکب آباد میں نور واہ کے قریب خوشحال خان خٹک ایکسپریس میں بم دھماکہ کی سخت ترین الفاظ میں مذمت کی ہے اور دھماکہ کے نتیجے میں متعدد مسافروں کے زخمی ہونے پر گہرے دکھ اور افسوس کااظہا رکیا ہے۔ ایک بیان میں رابطہ کمیٹی نے کہاکہ خوشحال خان خٹک ایکسپریس میں بم دھماکہ میں ملوث دہشت گرد ملک و قوم کے کھلے دشمن ہیں اور اپنے مذموم مقاصد کی تکمیل کیلئے معصوم و بے گناہ شہریوں کو نشانہ بنارہے ہیں۔رابطہ کمیٹی نے کہاکہ ملک میں انتہاء پسندی اور دہشت گردی کے خلاف جاری جنگ کے پیش نظر عوام کی جان ومال کے تحفظ کیلئے تمام ممکنہ وسائل اور ذرائع استعمال میں لائے جائیں اور دہشت گردی کے خلاف جنگ جیتنے کیلئے دہشت گردی میں ملوث درندہ صفت دہشت گردوں سمیت ان کے سرپرستوں ، حمایتیوں اورمدد گاروں کو بھی کیفر کردار تک پہنچانا ناگزیر ہوچکا ہے ۔رابطہ کمیٹی نے بم دھماکہ میں زخمی ہونے والے افراد سے دلی ہمدردی کااظہار کیا اوردعا کی کہ اللہ تعالیٰ زخمیوں کو جلد ومکمل صحت یابی عطا فرمائے ۔ رابطہ کمیٹی نے وزیراعظم نواز شریف ، وفاقی وزیر داخلہ چوہدری نثار علی خان ، گورنر سندھ ڈاکٹر عشرت العباد اور وزیراعلیٰ سندھ قائم علی شاہ سے مطالبہ کیا کہ جیکب آباد میں خوشحال خان خٹک ایکسپریس میں بم دھماکہ کا سختی سے نوٹس لیاجائے اورملک و قوم کو دہشت گردی کے عفریت سے فی الفور نجات دلائی جائے ۔