ایم کیوایم محمودآبادکے سیکٹرانچارج رفیق راجپوت کو گرفتارکرلیاگیا، رابطہ کمیٹی کااظہارمذمت

کراچی۔۔۔7 فروری 2015ء

متحدہ قومی موومنٹ کی رابطہ کمیٹی نے ایم کیوایم محمودآبادکے سیکٹرانچارج رفیق راجپوت کی گرفتاری کی شدیدالفاظ میں مذمت کی ہے ۔ اپنے ایک بیان میں رابطہ کمیٹی نے کہاکہ رینجرزاورقانون نافذ کرنے والے اداروں کے اہلکاروں کی بھاری نفری نے ہفتہ اوراتوارکی درمیانی شب تقریباًساڑھے تین بجے محمودآبادکے سیکٹرانچارج رفیق راجپوت کے گھرپرچھاپہ مارا۔ چھاپہ مارنے والوں میں کچھ اہلکار سادہ لباس میں بھی ملبوس تھے۔رابطہ کمیٹی نے کہاکہ رفیق راجپوت کوگرفتاری کے بعدنامعلوم مقام پر منتقل کردیاگیاہے اوران کے بارے میں کچھ نہیں بتایاجارہاہے کہ انہیں کہاں رکھاگیاہے۔ رابطہ کمیٹی نے کہاکہ گزشتہ دنوں کراچی میں ایم کیوایم کے کئی کارکنوں اور ذمہ داروں کوشہیدکردیاگیالیکن آج تک ان میں کسی ایک بھی شہیدکارکن کے کسی قاتل کوگرفتارنہیں کیاگیاہے بلکہ الٹاایم کیوایم کے کارکنوں اورعہدیداروں کوہی گرفتارکیاجارہاہے اورانہیں دوران حراست انسانیت سوزتشددکانشانہ بنایا جارہاہے اورتشددکے ذریعے اپنی مرضی کے بیانات لے کرانہیں جھوٹے مقدمات میں ملوث کیاجارہاہے ۔ رابطہ کمیٹی نے وزیراعظم نوازشریف، وزیرداخلہ چوہدری نثارعلی خان، گورنرسندھ ڈاکٹرعشرت العباد اوروزیراعلیٰ سندھ سیدقائم علی شاہ سے مطالبہ کیاکہ ایم کیوایم محمودآبادسیکٹرکے انچارج رفیق راجپوت کوفی الفوررہاکیاجائے اورایم کیوایم کے بے گناہ کارکنوں اورعہدیداروں کی گرفتاریوں کاسلسلہ بندکیاجائے۔