مسیحی مذہبی رہنماؤں کے نمائندہ وفد کی خورشید بیگم سیکریٹریٹ عزیز آباد میں رابطہ کمیٹی کے ارکان عارف خان ایڈووکیٹ اور اسلم آفریدی سے ملاقات

کراچی ۔۔۔3 فروری 2015ء 

مسیحی مذہبی رہنماؤں کے ایک نمائندہ وفد نے خورشید بیگم سیکریٹریٹ عزیز آباد میں رابطہ کمیٹی کے ارکان عارف خان ایڈووکیٹ اور اسلم آفریدی سے ملاقات کی اور حیدآباد میں الطاف حسین یونیورسٹی کا سنگِ بنیاد رکھے جانے پر دلی مبارکباد پیش کی ۔ وفد میں نیشنل ڈائریکٹر گاسپل پینٹی کاسٹل چرچ آف پاکستان معظم جون ، چیئرمین آف فیتھ پریئر منسٹریز پاکستان پاسٹر امجد فاروق ، پاسٹر افضل بھٹی ، اینجلیکل چرچ آف پاکستان پاسٹر افضل بھٹی شامل تھے اس موقع پر ایم کیوایم اقلیتی امور کمیٹی کے انچارج سید منور الاسلام ، ارکان بشپ جاوید انجم اور سردار کرشن سنگھ بھی موجود تھے ۔ ملاقات میں مسیحی مذہبی رہنماؤں نے رابطہ کمیٹی کے ارکان سے بات چیت کرتے ہوئے کہا کہ الطاف حسین یونیورسٹی کا سنگ بنیاد جناب الطاف حسین کی علم سے محبت اور اس کے حصول کی جستجو کا ثبوت ہے ۔ انہوں نے کہاکہ حیدرآباد میں یونیورسٹی کے قیام کے سلسلے میں جس طرح سے تعصب برتا گیا اور اسے بنانے کی راہ میں جو رکاوٹیں ڈالی گئیں وہ سب بے سودثابت ہوئیں جس سے ثابت ہوگیا کہ علم کے حصول کو پھیلنے سے روکنے والے کبھی اپنے مذموم مقاصد میں کامیاب نہیں ہوسکتے اور اسی طرح ذلیل و رسوا ہوتے رہے ہیں ۔ رابطہ کمیٹی کے ارکان نے وفد کے خیالات کو سراہا اور کہا کہ الطاف حسین یونیورسٹی حیدرآباد اور اندرون سندھ کے عوام کیلئے علم کی شمع ہے جس سے نکلنے والی روشنی اندرون سندھ میں شعور بیدار کرے گی اور انشاء اللہ علم اور شعور کی بدولت نہ صرف سندھ دھرتی کی قسمت بدلے گی بلکہ ملک بھی ترقی و خوشحالی کی راہ پر گامزن ہوگا ۔ 

*****