ایم کیو ایم کے ارکان سندھ اسمبلی عدنا ن احمد اور عبد الرؤف صدیقی کا گلشن اقبال میں کریکر حملوں سے متاثرہ اسکولوں کا دورہ

کراچی ۔۔۔3فروری2015ء

متحد ہ قومی موومنٹ کے ارکان سندھ اسمبلی عدنا ن احمد اور عبد الرؤف صدیقی نے گلشن اقبال میں دہشت گردوں کی جانب سے کریکر حملوں کے متاثرہ بیکن ہائی ہاؤس اور بیکن لائٹ اسکولوں کا دورہ کرکے اسکول انتظامیہ، طالب علموں اور انکے والدین سے ملاقات کی ہے۔ حق پرست ارکان اسمبلی نے اسکول انتظامیہ کو جناب الطاف حسین کی جانب سے دلی ہمدردی اورواقعہ کی سخت الفاظ میں مذمت کا پیغام پہنچایا ۔ اس موقع پر عدنا ن احمد اور عبد الرؤف صدیقی نے متاثرہ جگہ کا جائزہ لیا اور کریکر حملوں کے نتیجے میں جانی نقصان نہ ہونے پر اللہ تعالیٰ کا شکر ادا کیا۔انہوں نے اسکول انتظامیہ کے ارکان سے گفتگو کرتے ہوئے کہا کہ گزشتہ روز بھی کراچی کے علاقے سچل گوٹھ کے گورنمنٹ گرلز سکینڈری اسکول کی انتظامیہ کو بھی دہشت گردوں کی جانب سے دھمکی آمیز خط بھیجا جا چکا ہے جبکہ شہر کے مختلف اسکولوں کو دہشت گردوں کی جانب سے دھمکیوں کا سلسلہ جاری ہے ۔انہوں نے کہا کہ دہشت گرد ہماری آئندہ نسلوں کو حصول علم سے دور کرکے پاکستان کو تباہی کی جانب دھکیلنا چاہتے ہیں لہٰذا ہمیں اپنی صفوں میں اتحاد قائم کرکے ان مذموم عناصر کے خلاف جرأت و بہادری کا مظاہرہ کرناہوگا ۔ انہوں نے اس موقع پر دونوں اسکولوں کی انتظامیہ نے حق پرست ارکان اسمبلی کی آمد پر جناب الطاف حسین کا شکریہ ادا کیا ۔