ایم کیو ایم رابطہ کمیٹی کی کراچی کے علاقے گلشن اقبال میں دو اسکولوں پر دہشت گردوں کے کریکر حملوں کی سخت الفاظ میں مذمت

کراچی ۔۔۔03فروری2015ء

متحد ہ قومی موومنٹ کی رابطہ کمیٹی نے کراچی کے علاقے گلشن اقبال بلاک 7میں دو مختلف اسکولوں پر دہشت گردوں کی جانب سے کریکر حملے کی سخت الفاظ میں مذمت کی ہے ۔ایک بیان میں رابطہ کمیٹی نے واقعہ کو انتہائی افسوسنا ک قرار دیتے ہوئے کہاکہ دہشت گردوں کی جانب سے اسکولوں پر حملہ نے کراچی کے شہریوں کو شدید تشویش میں مبتلا کر دیا ہے ۔ انہوں نے کہا کہ انہوں نے کہا کہ ایک جانب دہشت گرد کراچی میں مختلف اسکولوں کو سنگین دھمکیاں دے رہے ہیں جبکہ دوسری جانب آ ج ایسے وقت میں کہ جب اسکولوں میں طلبہ کی آمد کا سلسلہ جاری ہوتاہے دہشت گردوں کی جانب سے کریکر حملوں نے تعلیمی اداروں کی حفاظت کیلئے صوبائی حکومت کے جھوٹے دعوؤں کی قلعی کھول دی ہے۔رابطہ کمیٹی نے کہا کہ ایم کیو ایم کے قائدجناب الطاف حسین ان مذموم کارروائیوں سے بچنے کیلئے ہی گزشتہ دہائی سے کراچی سمیت ملک بھر کے عوام سے اپیل کر رہے ہیں کہ وہ اپنے اور اپنے بچوں کے تحفظ کیلئے اپنی مدد آپ کے تحت حفاظتی محلہ کمیٹیاں تشکیل دیں تاکہ ان مذموم عناصر کے ناپاک عزائم کو ناکام بنایا جاسکے ۔ رابطہ کمیٹی نے وزیر اعظم میاں محمد نواز شریف ، وفاقی وزیر داخلہ چوہدری نثار علی خان سے مطالبہ کیا کہ وہ گلشن اقبال میں اسکولوں پر کریکر حملے کا سنجیدگی سے نوٹس لیکر اسکولوں کی سیکورٹی میں مزید اضافے کیلئے اقدامات کرکے کراچی سمیت ملک بھر میں اسکولوں، کالجوں ، یونیورسٹیوں سمیت مختلف تعلیمی اداروں کے طلبہ کی جان و مال کا تحفظ یقینی بنائیں ۔