ایم کیوایم کے قائد الطاف حسین نے کارکنوں کے بے حد اصراراورپرذوردرخواست پر تحریک کی قیادت سے دستبرداری کافیصلہ واپس لے لیا

لندن۔۔۔29، جنوری 2015ء

متحدہ قومی موومنٹ کے قائدجناب الطاف حسین نے جمعرات کی شب نائن زیرواورحیدرآبادمیں جمع ہونے والے کارکنوں کے بے حد اصراراورپرذوردرخواست پر تحریک کی قیادت سے دستبرداری کافیصلہ واپس لے لیا۔ جناب الطاف حسین کی جانب سے تحریک کی قیادت چھوڑنے اورجمعہ کواپناآخری خطاب کرنے کی بات سنکرایم کیوایم کے مرکز نائن زیرو اورحیدرآبادمیں کارکنان،نوجوان، بزرگ ، خواتین اورذمہ داران ہزاروں کی تعدادمیں جمع ہوگئے۔جناب الطاف حسین نے کارکنوں سے خطاب میں جب اس بات کو دہرایا کہ اسٹیبلشمنٹ مجھے قبول کرنے کوتیارنہیں ہے اورمیرے کارکنوں کومسلسل ماراجارہاہے لہٰذا تسلسل کے ساتھ ہونے والے کارکنوں کے ماورائے عدالت قتل کے واقعات کے باعث میں نے بہت سوچ وبچارکے بعدیہ فیصلہ کیاہے کہ میں ایم کیوایم کی قیادت سے دستبردار ہوجاؤں اورجمعہ کوحیدرآبادمیں اپناآخری خطاب کرکے آپ سے رخصت لے لوں۔ جناب الطاف حسین کی یہ بات سنکر تمام کارکنان جذباتی ہوگئے اورکھڑے ہوکرنامنظورنامنظورکے نعرے لگاتے رہے۔اس موقع پرتمام زبانیں بولنے والے ذمہ داران وکارکنان ، خواتین، ارکان پارلیمنٹ،اراکین رابطہ کمیٹی نے مائیک پر آکراپنے اپنے جذبات کااظہارکیااورآبدیدہ ہوکرجناب الطا ف حسین سے فیصلہ واپس لینے کی درخواست کی ۔ اس موقع پر نہایت جذباتی مناظردیکھنے میں آئے ، کئی ذمہ داران وکارکنان ،خواتین اوربزرگ جناب الطاف حسین کے فیصلے پرفرط جذبات سے رونے لگے اوران سے فیصلہ واپس لینے کااصرارکرتے رہے۔یہ سلسلہ دوگھنٹے سے زائددیرتک جاری رہا۔بالآخرکارکنوں کے پرذوراصراراوردرخواستوں پرجناب الطاف حسین نے یہ کہہ کر قیادت سے دستبرداری کافیصلہ واپس لے لیاکہ ’’ ساتھیو! خوش ہوجاؤ ، میں آپ کے ساتھ چلوں گا اورآپ کوچھوڑکرنہیں جاؤں گا ‘‘ ۔ جناب الطاف حسین کی یہ بات سنکرتمام کارکنان میں زبردست جوش وخروش پیداہوگیااورانہوں نے زوردارنعرے لگاکراس فیصلے کازبردست خیرمقدم کیا۔