پنجاب سے پٹرول ، بجلی اور گیس کے بحران کے خاتمے کیلئے عملی اقدامات کرنے کے بجائے حکومتی وزراء کی جانب سے ایک دوسرے پر کی جانے والی الزام تراشیاں افسوسناک ہیں ، صدر ایم کیوایم پنجاب میاں عتیق

لاہور ۔۔۔19، جنوری 2015ء 

متحدہ قومی موومنٹ پنجاب کے صدر میاں عتیق نے پنجاب میں پیٹرول ، بجلی اور گیس کے مسلسل اور سنگین بحران پر گہری تشویش کااظہار کرتے ہوئے پنجاب سے پٹرول ، بجلی اور گیس کے بحران کے خاتمے کیلئے عملی اقدامات کرنے کے بجائے حکومتی وزراء کی جانب سے ایک دوسرے پر کی جانے والی الزام تراشیوں پر افسوس کااظہار کیا ہے ۔ ایک بیان میں انہوں نے کہاکہ پنجاب بھر میں کئی دنوں سے پٹرول کے ساتھ ساتھ بجلی اور گیس کے بحرانوں نے عوام کی کمر توڑ کر رکھ دی ہے اور عوام ان کے حصول کیلئے مارے مارے پھر رہے ہیں اور ان کا کوئی پرسان حال نہیں ہے۔ انہوں نے کہا کہ پیٹرول کی قلت کے باعث روز مرہ استعمال کی اشیاء کی قیمتوں میں بھی اضافہ ہوگیا ہے اور لوگوں کی زندگیاں اجیرن بن چکی ہیں لیکن ملک کی معیشت چلانے کے حکومتی دعویداروفاقی وزراء ہی جب معیشت روکنے کا باعث بنیں گے تو ایسی صورتحال میں عوام کس کی جانب دیکھیں اور کس سے اپنے مسائل کے حل کی امیدرکھیں۔انہوں نے کہاکہ وفاقی وزیر اسحاق ڈار پٹرول بحران کی ذمہ داری قبول کرچکے ہیں جبکہ چوہدری نثار بھی یہ کہہ چکے ہیں کہ پٹرول بحران ہماری نااہلی ہے لیکن اس کے باوجود پنجاب میں پٹرول ، بجلی اور گیس کا بحران برقرار رہنا اور عوام کو پریشانی اور مشکلات میں مبتلا رکھنا سمجھ سے بالا تر اوران بحرانوں پر قابو پانے میں حکومت کی ناکامی کا کھلا ثبوت ہے۔ انہوں نے کہاکہ پنجاب میں پٹرول ، بجلی اور گیس کا بحران عملی طور پر حل کرنے کیلئے حکومتی سطح پر سنجیدہ اقدامات کرنا اولین فریضہ ہے لہٰذا وفاقی وزرا آپس کے لڑائی جھگڑے ختم کریں اور عوام کو پٹرول ، بجلی اور گیس کی مد میں فی الفور ریلیف فراہم کرنے کیلئے مثبت اقدامات عمل میں لائیں ۔ انہوں نے کہاکہ ملک پہلے ہی بحرانوں میں گھیرا ہوا ہے اور ایسی نازک ترین صورتحال میں عوام کی تکلیف کا احساس کرنے اور پٹرول ، بجلی اور گیس کے مسائل حل کرنے کیلئے سنجیدہ طریقے سے کام کرنے کے بجائے حکومتی وفاقی وزراء الٹا پے درپے پنجاب بھر کے عوام کو بحران در بحران میں مبتلا کررہے ہیں جس سے عوام میں مایوسی اور ناامیدی کے احساسات جنم لے رہے ہیں ۔ میاں عتیق نے کہا کہ وزیراعظم نواز شریف کی جانب سے پنجاب میں پیٹرول کے سنگین بحران کی تحقیقات کا حکم دینا خوش آئند ہے لیکن اس بحران پر حکومت کے وفاقی وزراء کی الزام تراشیاں بند کراکر پنجاب بھر کے عوام کو پٹرول ، بجلی اور گیس کے بحرانوں سے جلد از جلد عملی طور پر نجات دلائی جائے ۔