پنجاب میں پیٹرول کے سنگین بحران کا وزیراعظم نواز شریف کی جانب سے نوٹس لینے اور تحقیقات کا حکم دینے پرایم کیوایم رابطہ کمیٹی کا خیر مقدم

کراچی ۔۔۔18، جنوری 2015ء 

متحدہ قومی موومنٹ کی رابطہ کمیٹی نے پنجاب میں پیٹرول کے سنگین بحران پر وزیراعظم پاکستان نواز شریف کی جانب سے نوٹس لینے اور تحقیقات کا حکم دینے کا خیر مقدم کیا ہے ۔ ایک بیان میں رابطہ کمیٹی نے کہاکہ پنجاب میں پیٹرول کے بحران کے ساتھ ساتھ گیس اور بجلی کے بحران نے بھی شدت اختیار کی ہوئی ہے اور گیس اور بجلی کا بحران بھی وزیراعظم کی توجہ کا متقاضی ہے ۔ رابطہ کمیٹی نے کہاکہ کچھ روز قبل بھی ایم کیوایم نے پنجاب میں پیٹرول ، بجلی اور گیس کے سنگین بحران کی جانب توجہ مبذول کرائی تھی جس کے باعث معاشی ، تجارتی سرگرمیاں اور لوگوں کے معمولات زندگی شدید متاثر ہورہے ہیں اور عوام در بدر کی ٹھوکریں کھانے پر مجبور ہوچکے ہیں ۔ رابطہ کمیٹی نے کہاکہ پیٹرول اور اس کی مصنوعات انسانی زندگی کا لازمی جز ہے اوراس کے مسلسل بحران سے ملک معاشی طور پر پستی کا شکار ہورہا تھا اور ایسے میں وزیراعظم نواز شریف کی جانب سے پیٹرول کے سنگین بحران کا نوٹس لینا اور اس کی تحقیقات کا حکم دینا نہ صرف خوش آئند ہے بلکہ ملک کو معاشی طور پرتنزلی کی جانب جانے سے بچانے کا مستحسن اقدام ہے ۔ رابطہ کمیٹی نے وزیراعظم نواز شریف سے مطالبہ کیا کہ پنجاب میں پیٹرول کے سنگین بحران کے ساتھ ساتھ گیس اور بجلی کی بندش کا بھی نوٹس لیاجائے اور پیٹرول ، بجلی اور گیس کے بحران کو جلد از جلد دور کرنے کیلئے تیز ترین کارروائی عمل میں لائی جائے ۔