ناظم آباد میں مسجد کے باہر تعینات دو پولیس اہلکاروں پر نامعلوم دہشت گردوں کے حملے اور ان کی شہادت پر الطاف حسین کااظہار مذمت
ناظم آباد میں پولیس کی پٹرولنگ میں اضافہ کیاجائے، الطاف حسین کا آئی جی سندھ اور ڈی آئی جی سندھ سے مطالبہ
ناظم آباد میں تواتر کے ساتھ نامعلوم دہشت گرد ٹارگٹ کلنگ کرکے معصوم عوام کا مسلسل قتل کررہے ہیں ، الطاف حسین
اپنی مدد آپ کے اصول کے تحت ہر علاقے ، محلے کی ہر گلی میں ویجلینس کمیٹیاں یعنی چوکیداری نظام قائم کریں اور اپنی گلیوں اور محلوں کی حفاظت کریں ، کراچی کے عوام سے الطاف حسین کی اپیل
لندن۔۔۔18، جنوری 2015ء
متحدہ قومی موومنٹ کے قائد جناب الطاف حسین نے ناظم آباد میں مسجد کے باہر تعینات دو پولیس اہلکاروں پر نامعلوم دہشت گردوں کے حملے کی شدید الفاظ میں مذمت کی ہے اور دونوں پولیس اہلکاروں کی شہادت پر دعا کی کہ اللہ تعالیٰ ان کی مغفرت فرمائے اور لواحقین کو صبر جمیل عطا فرمائے ۔ جناب الطاف حسین نے آئی جی سندھ اور ڈی آئی جی سندھ سے پرزور مطالبہ کیا کہ ناظم آباد میں پولیس کی پٹرولنگ میں اضافہ کیاجائے کیونکہ ناظم آباد میں تواتر کے ساتھ نامعلوم دہشت گرد ٹارگٹ کلنگ کرکے معصوم عوام کا مسلسل قتل کررہے ہیں ۔ جناب الطاف حسین نے کہا کہ امن و عامہ کے حالات انتہائی نازک ہیں ، میں متعدد بار کراچی کے عوام سے اپیلیں کرچکا ہوں کہ اپنی مدد آپ کے اصول کے تحت ہر علاقے ، محلے کی ہر گلی میں ویجلینس کمیٹیاں یعنی چوکیداری نظام قائم کریں اور اپنی گلیوں اور محلوں کی حفاظت کریں ۔