سانحہ بادامی باغ نے پنجاب حکومت اور انتہا پسندوں کے گٹھ جوڑ کو بے نقاب کر دیا ۔ ایم کیو ایم امریکہ

واشنگٹن ڈی سی : 03-11-2013

ایم کیو ایم امریکہ کے سینٹرل آرگنائزر جنید فہمی، جوائنٹ سینٹرل آرگنائزرز محمد ارشد حسین اور ندیم صدیقی سمیت اراکین سینٹرل آرگنائزنگ کمیٹی توصیف خان، وسیم زیدی، ثاقب محی الدین، وکیل جمالی، محمد ظہیر، علی حسن، عامر قاضی، گل محمد ، اسد صدیقی نے بادامی باغ لاہور میں عیسائی آبادی پر حملے اور ان کے مکانات اور املاک نذر آتش کئے جانے کی شدید الفاظ میں مذمت کی ہے۔اپنے ایک مشترکہ بیان میں ایم کیو ایم امریکہ کے مرکزی ذمہ داران نے کہا کہ سانحہ بادامی باغ نظریہ پاکستان پر کھلا حملہ ہے جس نے ریاست کی بنیادوں کو ہلا کر رکھ دیا ہے ۔ انہوں نے کہا کہ قائد اعظم کے پاکستان میں جہاں اقلیتی برادری کو یکساں حقوق اور تحفظ دینے کا وعدہ کیا گیا تھا آج اقلیتیں کی عبادت گاہیں اور آبادیاں چند مذہبی انتہاپسندوں کے ہاتھوں یرغمال بن چکی ہیں ۔ انہوں نے مزید کہا کہ بادامی باغ کے انسانیت سوز واقعہ نے ثابت کر دیا ہے کہ مذہبی انتہا پسند اور شدت پسند گروپ پنجاب حکومت کے زیر سایہ نہ صرف پھل پھول رہے ہیں بلکہ پورے ملک میں اپنی کاروائیوں کے لئے پنجاب کی سر زمین کو استعمال بھی کر رہے ہیں ۔انہوں نے پاکستان کی مسیحی برادری کو یقین دلایا کہ ایم کیو ایم مشکل اور دکھ کی اس گھڑی میں ان کے ساتھ کھڑی ہے اور ان کو مکمل انصاف کی فراہمی تک چین سے نہیں بیٹھے گی۔ ایم کیو ایم امریکہ کی سینٹرل کمیٹی نے پنجاب حکومت سے مطالبہ کیا کہ وہ فی الفور کالعدم انتہا پسند گروپس کی حمایت بند کرے اور سانحہ بادامی باغ پر اپنی ناکامی اور نااہلی کو تسلیم کرتے ہوئے مستعفی ہو جائے۔