ایم کیوایم کے قائد جناب الطاف حسین نے وائی ایم سی سیکنڈری اسکول پر قبضہ کا نوٹس لے لیا
وائی ایم سی سیکنڈری اسکول سے لینڈ مافیا کا قبضہ واگزار کرایا جائے، الطاف حسین
شہر کے بچوں کو تعلیم سے محروم رکھنے کی ساز میں ملوث عناصر کسی بھی قسم کی رعایت کے مستحق نہیں ، الطاف حسین
قبضہ کرنے والے عناصر کے خلاف بلاامتیاز سخت ترین کارروائی کی جائے، الطاف حسین
لندن۔۔۔15، جنوری2015ء
متحدہ قومی موومنٹ کے قائد جناب الطاف حسین نے کراچی میں وائی ایم سی سیکنڈری اسکول پر لینڈ مافیا کے قبضہ کی سخت ترین الفاظ میں مذمت کی ہے اور مطالبہ کیا ہے کہ وائی ایم سی سیکنڈری اسکول سے لینڈ مافیا کا قبضہ واگزار کرایا جائے ۔ ایک بیان میں جناب الطاف حسین نے کہاکہ لینڈ مافیا کی جانب کراچی کے سرکاری اسکولوں پر قبضہ شہر کے بچوں کو تعلیم سے محروم رکھنے کی گھناؤنی سازش ہے اور جوعناصر اس گھناؤنے عمل میں ملوث ہیں وہ کسی بھی رعایت کے مستحق نہیں ہوسکتے ۔ جناب الطاف حسین نے کہاکہ آصف بوائز اسکول اور اخترگرلز اسکول شاہ فیصل کالونی کے بعد وائی ایم سی سیکنڈری اسکول پر لینڈ مافیا کے قبضے اور کلاس روم کوگودام میں تبدیل کرنے کا واقعہ انتہائی قابل مذمت ہے ۔جناب الطاف حسین نے گورنر سندھ ڈاکٹر عشرت العباد سے مطالبہ کیا کہ وائی ایم سی سیکنڈری اسکول پر قبضہ کا فوری نوٹس لیا جائے ، لینڈمافیا سے قبضہ فی الفور واگزارکرایا جائے اور قبضہ کرنے والے عناصر کے خلاف بلاامتیاز سخت ترین کارروائی کی جائے ۔