پاکستان میں متوسط طبقے کے بچوں کیلئے اعلیٰ تعلیم کا حصول نا ممکن ہوتا جارہا ہے،حق پرست اراکین سندھ اسمبلی عدنان احمد ،وسیم احمد

کراچی۔۔۔7جنوری2015ء

متحدہ قومی موومنٹ کے ا راکین صوبائی اسمبلی عدنان احمد او ر وسیم قریشی نے کہا ہے کہ دنیا بھر کی جامعات طلبا و طالبات کو خصوصی رعایتی پیکج اور کتابیں مہیا کرکے انہیں سہولیات فراہم کرتی ہیں جبکہ پاکستان میں متوسط طبقے کے بچوں کیلئے اعلیٰ تعلیم کا حصول نا ممکن ہوتا جارہا ہے تاہم ایسی گھمبیر صورتحال میں رعایتی قیمتوں پر کتابوں کا حصول طلبہء کیلئے کسی تحفے سے کم نہیں ہے۔ ان خیالات کا اظہار انھوں نے آل پاکستان متحدہ اسٹوڈینٹس آرگنائزیشن کے زیر اہتمام جامعہ این ای ڈی میں منعقدہ 3 روزہ کتب میلے کے دورے کے موقع پر۔اس مو قع پر اے پی ایم ایس او کے وائس چیئرمین محمد علی مصطفی ، سیکریٹری جنرل ثاقب اعجاز، طلبا و طا لبات و اساتذہ کی بڑی تعدا د مو جو د تھی۔ عدنان احمد اور وسیم قریشی نے کہا کہ باشعور طلبہ ہی کسی ملک کی ترقی کیلئے آخری امیدہوتے ہیں جو ملک کو جہالت کے اندھیروں سے نکال کر ترقی کی راہ پر گامزن کر سکتے ہیں۔ اس موقع پر اے پی ایم ایس او کے وائس چیئرمین علی مصطفی نے کہا کہ باشعور قومیں تعلیم کی بدولت ہی ترقی کے منازل طے کرتی ہیں اسی لئے ملک کے نوجوان طبقے کو چاہئے کہ تعلیم کے حصول پر اپنی بھرپور توجہ مرکوز رکھیں تاکہ ملک کا تعلیم یافتہ نوجوان طبقہ ملک میں نافذ اس کرپٹ نظام کے خاتمے میں اپنا بھرپور کردار ادا کر سکے۔ دریں اثناء سیکریٹری جنرل ثاقب اعجاز نے کہا کہ اے پی ایم ایس او اپنے آغاز سے ہی طلبہ کے لیے نصابی و ہم نصابی سرگرمیوں کا انعقاد کرا تی رہی ہے اور آج کا یہ کتب میلہ بھی گزشتہ روایات کے سلسلے کی کڑی ہے۔