ایم کیوا یم رابطہ کمیٹی کی لانڈھی کے علاقے خرم آباد میں رینجرز اہلکاروں پرطالبان دہشتگردوں کے دستی بم حملوں کی سخت الفاظ میں مذمت

کراچی ۔۔۔6جنوری2015ء 

متحدہ قومی موومنٹ کی رابطہ کمیٹی نے لانڈھی کے علاقے خرم آباد میں آپریشن کیلئے جانے والے رینجرز اہلکاروں پرکالعدم تحریک طالبان کے دہشت گردوں کی جانب سے دستی بم سے حملوں کی سخت الفاظ میں مذمت کی ہے ۔ ایک مذمتی بیان میں رابطہ کمیٹی نے کہاکہ شہر میں طالبان دہشتگرد وں اور انکے حامیوں نے اپنی کمیں گاہیں قائم کرلی ہیں جہاں سے وہ پولیس ، رینجرز کے جوانوں اورمعصوم شہریوں کو نشانہ بنا رہے ہیں ۔رابطہ کمیٹی نے کہا کہ جناب الطاف حسین 2004 سے کراچی میں طالبانائزیشن کے بڑھتے ہوئے نیٹ ورک سے قوم اور سیکیورٹی اداروں کو آگا ہ کر رہے تھے لیکن چند ناعاقبت اندیشوں نے قوم کو گمراہ کیا اور جناب الطاف حسین کے مؤقف کو غلط بیان کر کے طالبان دہشت گردوں کو شہر میں محفوظ پناہ گاہیں فراہم کیں جس کا خمیازہ آج کراچی کے معصوم شہریوں اور سیکیورٹی ادارروں کے اہلکاروں کو بھگتنا پڑ رہا ہے ۔رابطہ کمیٹی نے خرم آبا د میں طالبان کے حملے میں شہید ہونیوالے رینجر ز اہلکاروں کے اہل خانہ سے دلی تعزیت و ہمدردی کا اظہار کرتے ہوئے دعا کی کہ اللہ تعالیٰ دونوں شہید اہلکاروں کے درجات بلند کرکے انہیں اپنی جوار رحمت میں جگہ عطا فرمائے ۔رابطہ کمیٹی نے گورنر سندھ ڈاکٹر عشرت العباد خان ، وزیر اعلیٰ سندھ سید قائم علی شاہ ،آرمی چیف جنرل راحیل شریف اور ڈی رینجرز سندھ سے مطالبہ کیا کہ وہ کراچی میں طالبان دہشتگردوں اور انکو تحفظ فراہم کرنے والے عناصر کے خلاف اور شہر سے طالبان کی کمیں گاہیں ختم کرنے کیلئے ہنگامی بنیادوں پر کار روائیاں کریں ۔