ایم کیوایم رابطہ کمیٹی کی ناظم آباد گول مارکیٹ میں دکان پر مسلح دہشتگردوں کی شدید فائرنگ کی مذمت

کراچی۔۔۔6جنوری2015ء

متحد ہ قومی موومنٹ کی رابطہ کمیٹی نے کراچی کے علاقے ناظم آباد گول مارکیٹ میں دکان پر چار موٹر سائیکلوں پر سوار مسلح دہشتگردوں کی شدید فائرنگ کے نتیجے میں دو سگے بھائیوں20سالہ اسد ولد شبیر اور22سالہ سلمان ولد شبیر کے جاں بحق اوردو کے افراد زخمی ہونے کے واقعہ کی سخت الفاظ میں مذمت کی ہے۔ ایک مذمتی بیان میں رابطہ کمیٹی نے کہا کہ واقعہ شہر میں فرقہ وارانہ فسادات کرانے کی کوشش اور بھائی کو بھائی سے لڑانے کی ساز شوں کا حصہ ہے تاکہ قوم کی توجہ طالبان دہشتگردوں کے خلاف ہونیوالی نتیجہ خیز کار روائیوں سے ہٹا ئی جاسکے۔ رابطہ کمیٹی نے کہا کہ دہشتگرد شہر میں فرقہ وارانہ فسادات کی آگ کو ہوا دیکر اس قسم کی بزدلانہ کار روائیوں کہ ذریعے کراچی کو آگ و خون میں نہلانا چاہتے ہیں لیکن انشاء اللہ ایسے عناصر کو ناکامی کا منہ دیکھنا پڑے گا اور ان پر اللہ کا عذاب نازل ہوگا ۔رابطہ کمیٹی نے تمام مکاتب فکر کے علما ء کرام اور عوام سے اپیل کی کہ وہ پر امن رہیں اور اپنی صفوں میں اتحاد برقرار رکھیں اور شہر میں امن خراب کرنے کی سازشیں کرنیوالے عناصر پر کڑی نظر رکھیں ۔ رابطہ کمیٹی نے وزیر اعظم میاں محمد نواز شریف ، وفاقی وزیر داخلہ چوہدری نثار علی خان ، گورنر سندھ ڈاکٹر عشرت العباد خان اور وزیر اعلیٰ سندھ سے مطالبہ کیاکہ وہ گول مارکیٹ پر فائرنگ کے واقع میں ملوث سفاک عناصر کو فوری گرفتار کرکے قانون کے مطابق سخت سز ادیں اور شہر میں فرقہ وارانہ فسادات کی سازشوں کے درپردہ قوتوں سے شہر کو پاک کریں ۔
English Viewers