جناب الطاف حسین کا ٹمبر مارکیٹ پر قائم ایم کیو ایم کے امدادی کیمپ پر رابطہ

لندن ۔۔۔یکم جنوری2014ء

متحدہ قومی موومنٹ کے قائد جناب الطاف حسین نے آتشزدگی سے متاثرہ ٹمبر مارکیٹ پر قائم ایم کیو ایم کے امدادی کیمپ پر رابطہ کرکے امدادی سرگرمیوں میں موجود حق پرست اراکین اسمبلی ، ذمہ داران و کارکنان ، خدمت خلق فاؤنڈیشن کے رضا کاران کو نئے سال کی مبارک باد پیش کی ہے اور ٹمبرمارکیٹ سانحہ کے متاثرین کیلئے نیک تمناؤں کا اظہار اور دعا کی ہے ۔ اس موقع پر حق پرست اراکین اسمبلی کامران فاروقی ، عبد الحسیب ، مظاہر امیر اورجمال احمد سمیت کے کے ایف کے رضاکاران ، مختلف سیکٹرز کے کارکنان اور متاثرین کی بڑی تعداد موجود تھی ۔ جناب الطاف حسین نے وہاں موجود ذمہ داران سے متاثرین کیلئے امدادی سرگرمیوں کی معلوما ت و تفصیلات معلوم کیں اور انہیں ہر ممکن امداد و تعاون فراہم کرنے کی ہدایت کی ۔ اس موقع پر حق پرست اراکین اسمبلی نے جناب الطاف حسین کو بتایا کہ انکی ہدایت و رہنمائی پر عمل کرتے ہوئے ایم کیوایم کے اراکین اسمبلی ، کارکنان اور خدمت خلق فاؤنڈیشن کے رضا کاران بے لوث ٹمبر مارکیٹ سانحہ متاثرین کی امداد کر رہے ہیں جس کے جواب میں متاثرہ عوام و تاجر برادری جناب الطاف حسین کا شکریہ اور انکے لئے ڈھیروں دعائیں کر رہے ہیں ۔ کیمپ پر موجود ذمہ داران نے جناب الطاف حسین کو آگا ہ کرتے ہوئے کہا کہ ایم کیوایم کی اپیل کے بعد سے اب تک تقریباً 90فیصد سے زائد متاثرین نے اپنے نقصانات کے تخمینے اور کوائف نامے ایم کیوایم کے امدادی کیمپ پر جمع کر وادئیے ہیں اور جب ایم کیو ایم کے ذمہ داران ان کوائف ناموں کی جانچ پڑتال مکمل کرلیں گے تو انہیں حکمرانوں اور انتظامیہ کے سامنے پیش کردیا جائے گا تاکہ ٹمبر مارکیٹ آتشزدگی کا نشانہ بننے والے سینکڑوں خاندانوں اور تاجر برادری کے نقصانات کا فوری ازالہ کیا جاسکے۔ اس موقع پر امداد ی سرگرمیوں میں مصروف کارکنان اور متاثرین ٹمبر مارکیٹ آتشزدگی نے بھی جناب الطاف حسین کو نئے سال کی مبارک باد پیش کی اور انہیں دعائیں دیں۔