پاکستان کو الطاف حسین جیسے جری ،نڈر اور بہادر رہنماؤں کی ضرورت ہے، علامہ عباس کمیلی

کراچی ۔۔۔31،دسمبر2014ء

جعفریہ الائنس کے سربراہ اور معروف شیعہ عالم دین علامہ عباس کمیلی نے کہاہے کہ پاکستان کو جناب الطاف حسین جیسے جری ،نڈر اور بہادر رہنماؤں کی ضرورت ہے اور انسانیت کیلئے جناب الطاف حسین کا کردار کبھی فراموش نہیں کیاجاسکتا۔ یہ بات انہوں نے ایم کیوایم انٹرنیشنل سیکریٹریٹ لندن میں رابطہ کمیٹی کے ارکان سے ٹیلی فون پرگفتگو کرتے ہوئے کہی۔ علامہ عباس کمیلی نے کہاکہ جناب الطاف حسین کی سیاست کامقصد خلق خدا کی خدمت ہے اور خلق خدا سے بڑھ کرکوئی عبادت نہیں ہے۔ جناب الطاف حسین نے تمام مکاتب فکر کے علماء کو ایک پلیٹ فارم پر متحد کرکے دین اسلام اور انسانیت کی خدمت کی ہے اور، ملک میں مذہبی رواداری اور فرقہ وارانہ ہم آہنگی کے فروغ کیلئے جناب الطاف حسین کا کردار ناقابل فراموش ہے،ملک وقوم کوان جیسے جری، نڈر اوربہادر رہنماؤں کی ضرورت ہے ۔ انہوں نے کہاکہ مذہب کی آڑ میں خودکش حملے ، بم دھماکے اور قتل وغارتگری کرنے والے طالبان دہشت گرد اور ان کے سرپرست دراصل خوارج اور منافقین ہیں اورانکے حوالہ سے جناب الطاف حسین کے جراتمندانہ مؤقف سے تمام مکاتب فکرکے علمائے کرام متفق ہیں۔وقت کا تقاضا ہے کہ پاکستان کی ترقی وخوشحالی ،ملک سے مذہبی انتہاء پسندی کے خاتمہ کیلئے سفاک طالبان دہشت گردوں کی حمایتی جماعتوں کا بھی مکمل سوشل بائیکاٹ کیاجائے ۔انہوں نے جناب الطاف حسین کی صحت وتندرستی کیلئے دعا بھی کی۔