کے ایم سی میں صوبائی حکومت کی ایماء پر اربوں روپے کے ترقیاتی منصوبوں کو بغیر ٹینڈر دیئے جانے، کمیشن کی وصولیوں اور بوگس ادائیگیوں پر ایم کیوایم رابطہ کمیٹی کا اظہار مذمت

کراچی ۔۔۔31، دسمبر2014ء 

متحدہ قومی موومنٹ کی رابطہ کمیٹی نے کراچی میونسپل کارپوریشن میں صوبائی حکومت کی ایماء پر اربوں روپے کے ترقیاتی منصوبوں کو بغیر ٹینڈرکے دیئے جانے ، کمیشن کی وصولیوں اوربوگس ادائیگیوں کی سخت ترین الفاظ میں مذمت کی ہے اور اسے کھلی اقرباء پروری کا عمل قرار دیا ہے ۔ ایک بیان میں رابطہ کمیٹی نے کہا کہ جب ترقیاتی منصوبوں کو بغیر ٹینڈر دیاجائے گا تو اس عمل سے ہر ذی شعور شخص اندازہ لگاسکتا ہے کہ یہ ترقیاتی منصوبے ناقص ہوں گے اور مستقبل میں انسانی صحت اور جانوں کیلئے بھی خطرناک ثابت ہوسکتے ہیں ۔ رابطہ کمیٹی نے کہاکہ صوبائی حکومت ، اس کے وزراء اور پیپلزپارٹی کے رہنماء کراچی کے ترقیاتی منصوبوں میں اقرباء پروری کا عمل کرکے کھلی کراچی دشمنی کا مظاہرہ کررہے ہیں اور اس کے عوام کے ساتھ تعصب برت رہے ہیں ۔ رابطہ کمیٹی نے کہاکہ صوبائی حکومت کے وزراء کی ایماء پر کے ایم سی اور دیگر محکموں میں لوٹ مار کا بازار گرم ہے ، میرٹ کی دھجیاں اڑائی جارہی ہے اور آئین و قانون کو پیروں تلے روندھا جارہا ہے جبکہ کراچی کے سرکاری اداروں کو فعال کرنے کے بجائے انہیں تنزلی کی جانب دھکیلاجارہا ہے ۔ رابطہ کمیٹی نے وزیراعظم نوازشریف ، گورنر سندھ ڈاکٹرعشرت العباد اور وزیراعلیٰ سندھ سید قائم علی شاہ سے مطالبہ کیا کہ کے ایم سی میں صوبائی حکومت کے وزراء کی ایماء پر کراچی کے ترقیاتی منصوبوں میں کرپشن اور خورد برد کا سنجیدگی سے نوٹس لیاجائے ، بغیر ٹینڈر دیئے گئے ترقیاتی منصوبوں کے ٹینڈر منسوخ کئے جائیں اور سرکاری اداروں میں وزراء کی لوٹ مار اور کرپشن کا سلسلہ فی الفور بند کرایاجائے ۔