وفاقی وزیر خزانہ اسحاق ڈار کا قائد ایم کیوایم الطاف حسین سے ٹیلی فون پر رابطہ

لندن۔۔۔28،دسمبر2014ء
وڈیو
وفاقی وزیرخزانہ اسحاق ڈار نے ایم کیوایم کے قائد جناب الطاف حسین سے ٹیلی فون پر رابطہ کرکے کراچی کی ٹمبر مارکیٹ میں ہونے والی آتشزدگی کے نتیجے میں ہونے والے مالی نقصان پر دلی افسوس کااظہار کیا۔ جناب الطاف حسین نے وفاقی وزیرخزانہ سے گفتگو کرتے ہوئے کہا کہ سندھ کی صوبائی حکومت آتشزدگی سے متاثرہ عوام کی مدد کے بجائے محض وضاحتیں کررہی ہے ۔ کراچی جیسے بڑے شہر میں قدرتی آفات ، سانحات اور حادثات سے عوام کی جان ومال کے تحفظ کیلئے کسی قسم کے عملی اور ٹھوس اقدامات دیکھنے میں نہیں آرہے ہیں لہٰذا کسی بھی قدرتی آفات اور حادثات میں عوام کی جان ومال کے تحفظ کیلئے وفاقی حکومت کو بھی اپنا بھرپور کردار ادا کرنا چاہیے۔ انہوں نے مزید کہاکہ اگرٹمبر مارکیٹ کراچی میں لگنے والی آگ کو بروقت بجھانے کے انتظامات کیے جاتے،صوبائی حکومت اور شہری انتظامیہ اپنے فرائض کی ادائیگی میں مجرمانہ غفلت کامظاہرہ نہ کرتیں تو شہریوں کی املاک کو بچایاجاسکتا تھا۔جناب الطاف حسین نے کہاکہ اتنے بڑے شہر میں آگ پر قابو پانے کیلئے فائربریگیڈ جیسا اہم ادارہ جدید گاڑیوں اور آگ بجھانے کے دیگر جدید آلات سے محروم ہے۔ اس سلسلے میں صوبائی حکومت کے ساتھ ساتھ وفاقی حکومت بھی اپنی ذمہ داری کااحساس کرے اور خصوصی فنڈز فراہم کرے۔ انہوں نے کہا کہ وفاقی وصوبائی حکومتوں کا فرض ہے کہ وہ وی وی آئی پی کلچر کا خاتمہ کرکے حکومت کے ہرشعبہ میں کفایت شعاری سے کام لے، وزرائے اعلیٰ، گورنرز اور وزراء کی شاہ خرچیاں بند کی جائیں اور سرکاری فنڈز کو عوام کے بنیادی مسائل کے حل کیلئے استعمال کیا جائے۔ جناب الطاف حسین نے وفاقی حکومت سے اپیل کی کہ ٹمبرمارکیٹ کراچی میں آتشزدگی سے متاثرہ عوام کی بھرپور مدد کی جائے ۔ جناب الطاف حسین نے تجویز دی کہ وفاقی حکومت قانون سازی کرکے اس بات کویقینی بنائے کہ چاروں صوبوں میں حکمراں جماعت اپنے جلسے جلوسوں میں سرکاری وسائل ،سرکاری مشینری اورافرادی قوت استعمال نہ کرسکے۔ 

وفاقی وزیرخزانہ اسحاق ڈار نے آتشزدگی کے نتیجے میں شہریوں کی قیمتی املاک خاکستر ہونے پر دلی افسوس کااظہارکرتے ہوئے جناب الطاف حسین کو یقین دلایا کہ وفاقی حکومت ، کراچی میں آتشزدگی سے متاثرہ عوام کی ہرممکن مددکرے گی ۔انہوں نے کہا کہ 18 ویں ترمیم کے بعد صوبوں کو اختیارات دیئے گئے ہیں اور گزشتہ سال سندھ حکومت کو این ایف سی ایوارڈ کی مدد میں 16 فیصد اضافی فنڈز فراہم کیے گئے ہیں اور یہ سندھ حکومت کی ذمہ داری ہے کہ وہ قدرتی آفات اور حادثات کی روک تھام اور شہریوں کی جان ومال کے تحفظ کیلئے ان فنڈز کو استعمال کرے ۔ حکومت سندھ کو چاہیے کہ وہ اس سلسلے میں اپنی ترجیحات طے کرے اوروفاق کی جانب سے دیئے گئے فنڈز کو استعمال کرے ۔ انہوں نے جناب الطاف حسین کی بات سے مکمل اتفاق کرتے ہوئے کہاکہ وی وی آئی پی کلچر اور شاہ خرچیوں کا کلچر تبدیل کرنا وقت کی اہم ترین ضرورت ہے ۔انہوں نے جناب الطاف حسین سے کہاکہ آپ دکھی انسانیت کی خدمت ، عبادت سمجھ کر ادا کررہے ہیں اور اللہ تعالیٰ آپ کو اس کار خیر کا اجردے گا۔