آرمی چیف جنرل راحیل شریف اور آئی ایس آئی چیف جنرل رضوان اختر سرکاری زمینوں کی لوٹ ماراور کرپشن کی لعنت کی روک تھام کیلئے بھی فوری اقدامات کروائیں۔ الطاف حسین

لندن۔۔۔26دسمبر2014ء

متحدہ قومی موومنٹ کے قائد جناب الطاف حسین نے چیف آف آرمی اسٹاف جنرل راحیل شریف اورآئی ایس آئی کے چیف جنرل رضوان اخترنے اپیل کی ہے کہ ملک سے دہشت گردی کے خاتمہ کے ساتھ ساتھ سرکاری زمینوں کی لوٹ ماراور کرپشن کی لعنت کی روک تھام کیلئے بھی فوری اقدامات کئے جائیں۔انہوں نے یہ اپیل آج رابطہ کمیٹی پاکستان اورلندن کے ارکان سے گفتگو کرتے ہوئے کہی۔ جناب الطاف حسین نے کہاکہ آرمی چیف جنرل راحیل شریف اورڈی جی آئی ایس آئی جنر رضوان اختر اورپاک فوج کی قیادت ملک کوبچانے کیلئے مذہبی انتہا پسند دہشت گردوں کے خلاف جرات وہمت اوربہادری کے ساتھ جواقدامات کررہی ہے وہ قابل تحسین ہے۔ انہوں نے آرمی چیف اورآئی ایس آئی کے سربراہ سے اپیل کی کہ دہشت گردی کے خاتمہ کے ساتھ ساتھ اگروہ پاکستان خصوصاً کراچی میں قیمتی سرکاری زمینوں کی کوڑیوں کے دام خریدوفروخت اورکرپشن کی لعنت کے خاتمہ کیلئے اقدامات کریں تویہ ملک پراحسان ہوگا کیونکہ جس طرح مذہبی انتہا پسندعناصر ملک کونقصان پہنچارہے ہیں اسی طرح کرپشن کی لعنت بھی ملک کودیمک کی طرح چاٹ رہی ہے۔ لہٰذا ضرورت اس بات کی ہے کہ دہشت گردوں سے سختی سے نمٹنے کے ساتھ ساتھ سرکاری زمینوں کوکوڑیوں کے دام خریدنے اور بیچنے والے عناصر کے خلاف بھی سخت سے سخت اقدامات کئے جائیں چاوہ کسی بھی منصب پر فائزہوں اورکتنے ہی بااثر کیوں نہ ہوں ۔ ایسے عناصر کے خلاف کاروائی کیلئے فوری اورخصوصی اقدامات کئے جائیں تاکہ ملک کرپشن کی لعنت سے پاک ہو۔ انہوں نے ایم کیوایم کے سینیٹرز اورارکان قومی وصوبائی اسمبلی سے بھی کہاکہ وہ اس معاملے کوایوانوں میں اٹھائیں۔