ایم کیوایم ، پاکستان میں صحیح معنوں میں جمہوریت کانفاذ چاہتی ہے، الطاف حسین

لندن۔۔۔25،دسمبر2014ء

متحدہ قومی موومنٹ کے قائد جناب الطاف حسین نے کہاہے کہ ایم کیوایم ، پاکستان میں صحیح معنوں میں جمہوریت کانفاذ چاہتی ہے جہاں امیراور غریب سب کو زندگی گزارنے کے یکساں مواقع میسر آسکیں۔ یہ بات انہوں نے نائن زیروعزیزآباد میںUK Independene Party کے رہنما اور یورپین پارلیمنٹ کے منتخب رکن امجد بشیر سے ٹیلی فون پر گفتگو کرتے ہوئے کہی۔ اس موقع پر رابطہ کمیٹی کے ارکان بھی موجود تھے ۔ جناب الطا ف حسین نے یورپین پارلیمنٹ کے رکن امجد بشیر کو اپنی رہائش گاہ تشریف لانے پر خوش آمدید کہتے ہوئے کہاکہ ایم کیوایم ،ملک سے فرسودہ جاگیردارانہ نظام کاخاتمہ اور98 فیصد غریب ومتوسط طبقہ کے عوام کی حکمرانی کیلئے جدوجہد کررہی ہے۔انہوں نے ملک میں امن و امان کی خراب صورتحال کا تذکرہ کرتے ہوئے کہاکہ ملک میں امن وامان کے قیام کیلئے مقامی پولیس کا نظام ضروری ہے۔ انہوں نے کہاکہ آبادی میں اضافے کے پیش نظردنیا بھر میں نئے نئے صوبے قائم کیے گئے ہیں لہٰذا انتظام حکومت کو مؤثر اور مربوط بنانے کیلئے ضروری ہے کہ پاکستان میں بھی نئے انتظامی یونٹس اور نئے صوبوں کا قیام عمل میں لایا جائے۔ انہوں نے کہاکہ بدقسمتی سے پاکستان کی تاریخ میں کسی بھی جمہوری حکومت نے بلدیاتی انتخابات نہیں کرائے گئے اور اختیارات نچلی سطح تک منتقل کرنے سے گریز کیاجاتا رہا ہے ۔ جمہوریت کے استحکام اورعوام کے بنیادی مسائل کے حل کیلئے مقامی حکومتوں کے نظام کا قیام ناگزیر ہے ۔

امجد بشیر نے جناب الطاف حسین کے خیالات سے اتفاق کرتے ہوئے کہاکہ ایم کیوایم کے منشور اور اس کی جدوجہد کا جائزہ لینے کے بعد میں اس نتیجے پر پہنچا ہوں کہ واقعی ایم کیوایم ایک لبرل اور واحد جماعت ہے جس نے منتخب ایوانوں میں مڈل کلاس کے تعلیم یافتہ افراد کوبھیجااور موروثی سیاست کے خلاف عملی جدوجہد کی۔انہوں نے کہاکہ ایم کیوایم کسی ایک طبقہ کی نہیں بلکہ پاکستان کی تمام قومیتوں کی نمائندہ جماعت ہے ، سب کے حقوق کیلئے جدوجہد کررہی ہے اور غیرمسلم پاکستانیوں کے حقوق کیلئے ایم کیوایم کی جدوجہد قابل قدر ہے ۔