لال مسجدکے ترجمان کاوضاحتی بیان اس بات کااعتراف ہے کہ جامعہ حفصہ میں ایسی لڑکیاں موجود ہیں جنہیں انکے والدین کی مرضی کے بغیروہاں زبردستی رکھاگیاہے۔ ڈاکٹرایوب شیخ،رکن رابطہ کمیٹی ایم کیوایم

کراچی۔۔۔23، دسمبر2014ء

متحدہ قومی موومنٹ کی رابطہ کمیٹی کے رکن ڈاکٹرایوب شیخ نے قائدتحریک الطاف حسین کے بیان پر لال مسجدکے ترجمان کے جوابی بیان پر تبصرہ کرتے ہوئے کہاہے کہ لال مسجد کے ترجمان کاوضاحتی بیان دراصل اس بات کااعتراف ہے کہ جامعہ حفصہ میں ایسی لڑکیاں موجودہیں جنہیں وہاں ان کے والدین کی مرضی کے بغیر زبردستی رکھاگیاہے جن کے والدین اپنی بچیوں سے ملناچاہتے ہیں اورانہیں اپنے گھرواپس لے جاناچاہتے ہیں لیکن جامعہ حفصہ کے لوگ انہیں گھرواپس جانے اوراپنی بچیوں سے ملنے کی اجازت نہیں دے رہے ہیں۔ ڈاکٹرایوب شیخ نے کہا کہ قرآن مجیدمیں اللہ تعالیٰ کاواضح فرمان ہے کہ ’’ لااکراہ فی الدین ‘‘ یعنی دین میں کوئی جبرنہیں ، لیکن لال مسجد اورجامعہ حفصہ میں قرآن مجیدکی تعلیم کی کھلی نفی کی جارہی ہے ۔ ڈاکٹرایوب شیخ نے وزیراعظم نوازشریف وزیرداخلہ چوہدری نثار، آرمی چیف جنرل راحیل شریف سے مطالبہ کیاکہ جامعہ حفصہ میں جبرارکھی گئی بچیوں کوان کے والدین کے حوالے کیاجائے ۔