14دسمبر1986ء کو ظالموں نے قصبہ علیگڑھ میں آگ و خون کا جو کھیل کھیلا تھا اسے تاریخ کبھی نہیں بھلا سکتی، الطاف حسین

سانحہ 14دسمبر1986ء کی 28ویں برسی پر جناب الطاف حسین کا شہداء کو زبردست خراج عقیدت

لندن ۔۔۔13دسمبر2014ء

متحد ہ قومی موومنٹ کے قائد جناب الطاف حسین نے سانحہ14دسمبر1986ء قصبہ علیگڑھ کے تمام شہداء کو زبردست خراج تحسین پیش کیاہے ۔ سانحہ قصبہ علیگڑھ1986ء کی 28ویں برسی کے موقع پر جناب الطاف حسین نے کہا کہ تحریک کی آبیاری میں حق پر ست شہداء کالہو انتہائی اہم ہے اوریہ حق پرست شہداء کے لہو کا صدقہ ہی ہے کہ آج ایم کیو ایم کا نظریہ تیزی سے ملک کے چپے چپے میں پھیل رہا ہے ۔ جناب الطاف حسین نے کہا کہ14دسمبر1986ء کو ظالم دہشتگردو ں نے قصبہ علیگڑھ میں آگ و خون کا جو کھیل کھیلا تھا اسے تاریخ کبھی بھلا نہیں سکے گی۔انہوں نے کہا کہ جب مسلسل6گھنٹوں تک معصوم و بیگناہ بچوں ، عورتوں ، بچیوں ، بزرگوں اور نوجوانوں پر جدید آتشی اسلحہ سے براہ راست فائرنگ کرکے سیکڑوں افراد کو ابدی نیند سلا دیا گیا اور خواتین و نوجوان بچیوں کی آبرو ریزی کی گئی لیکن ظالموں کے ظلم کے خلاف کوئی آواز نا اُٹھی ۔ انہوں نے کہا کہ ایم کیوایم کے کارکنان ماضی میں بھی اپنے شہداء کو کبھی نہیں بھولے اور انکے نقش قدم پر آج بھی ثابت قدمی سے چل رہے ہیں ۔انہوں نے کہا کہ اس ہولناک سانحہ میں ملوث دہشتگرد اور انکے سر پرستوں کو آج تک کسی حکومت نے گرفتار کرکے کیفر کردار تک نہیں پہنچایا اورسیکڑوں خاندانوں اور معصوم بچیوں کو برباد کرنے کے بعد بھی یہ سفاک دہشتگرد اور انکے سرپرست عیش و آرام کی زندگیاں گزار رہے ہیں۔ جناب الطاف حسین نے وزیر اعظم میاں محمد نواز شریف، وفاقی وزیر داخلہ چوہدری نثار علی خان سے مطالبہ کیا کہ وہ سانحہ14دسمبر1986ء میں ملوث مرکزی کرداروں اور اس سوچے سمجھے قتل عام
میں ملوث دہشتگردوں کو گرفتار کرکے سینکڑوں بیگناہ خاندانوں کو انصاف دلائیں۔

QasbaAligarhMassacre#