وزیر اعظم کی جانب سے بجلی کی قیمتوں میں کمی ملک کے غریب و متوسط طبقے کیلئے خوش آئند اقدام ہے، الطاف حسین

لندن ۔۔۔12، دسمبر2014ء 

متحدہ قومی موومنٹ کے قائد الطاف حسین نے وزیراعظم پاکستان میا ں محمد نواز شریف کی جانب سے بجلی کی قیمتوں میں کمی کوملک بھر کے غریب و متوسط طبقے کے عوام کیلئے حکومت کا خوش آئند اور مثبت اقدام قرار دیا ہے ۔ ایک بیان میں جنا ب الطاف حسین نے کہا کہ ملک بھر کے عوام بنیادی ضروریات زندگی کی اشیاء کی قیمتوں میں اضافے اور بیروزگاری کے سبب پریشان حال زندگی گزار رہے ہیں اور ایسے میں وزیراعظم نے پیٹرول کے بعد بجلی کی قیمتوں میں کمی کا اعلان کرکے ملک کے غریب و مظلوم عوام کو عملی طور پر ریلیف فراہم کیا ہے ۔جناب الطاف حسین نے مطالبہ کیا کہ بجلی کی قیمتوں میں مزید کمی کی جائے ۔ انہوں نے کہا کہ ایم کیوایم عوامی جماعت ہے اور حکومتی سطح پر ہر اس فیصلے کی حمایت اور خیر مقدم کرتی آئی ہے اور کرتی رہے گی جس سے غریب عوام کو عملی طور پر ریلیف ملے اور عوامی مسائل اور مشکلات میں کمی کی جاسکے ۔ انہوں نے کہا کہ اس سے قبل بھی پیٹرولیم مصنوعات کی قیمتوں میں کمی کئے جانے کے باوجود ٹرانسپورٹ مالکان نے پبلک ٹرانسپورٹ کے کرایوں میں من مانی کمی کی جس سے عوام کو خاطر خواہ فائدہ نہیں پہنچا جس کے سبب عوام کی مشکلات آج بھی اپنی جگہ پر برقرار ہیں ۔ جناب الطاف حسین نے امید کا اظہار کیا کہ وزیر اعظم پاکستان میاں محمد نواز شریف کی بجلی کی قیمتوں میں کمی کے ثمرات کی نچلی سطح تک منتقلی کو بھی یقینی بنائیں گے تاکہ غریب و متوسط طبقے کے عوام کو حقیقی معنوں میں اس کے فوائد منتقل ہو سکیں گے۔