فیصل آباد میں نجی ٹی وی کی نمائندہ ماریہ میمن کو تشدد کا نشانہ بنانے پر رابطہ کمیٹی کا اظہار مذمت
پیشہ وارانہ فرائض کی ادائیگی کے دوران صحافیوں کو تشدد کا نشانہ بنانا آزادی صحافت پر قدغن لگانے کے مترادف ہے، رابطہ کمیٹی
جو عناصر اس قسم کی مذموم کارروائیوں میں ملوث ہیں وہ جمہوریت، انسانیت اور آزادی صحافت کے کھلے دشمن ہیں، رابطہ کمیٹی
حکومت اور اپوزیشن جماعتیں صحافیوں کی جان و مال کا تحفظ یقینی بنائیں اور شرپسند عناصر پر کڑی نظر رکھیں، رابطہ کمیٹی کی اپیل
کراچی ۔۔۔8، دسمبر2014ء
متحدہ قومی موومنٹ کی رابطہ کمیٹی نے فیصل آباد میں شرپسند عناصر کی جانب سے نجی ٹی وی کی نمائندہ ماریہ میمن کو تشدد کا نشانہ بنانے کی سخت ترین الفاظ میں مذمت کی ہے ۔ ایک بیان میں رابطہ کمیٹی نے کہا کہ پیشہ وارانہ فرائض کی ادائیگی کے دوران صحافیوں کو تشدد کا نشانہ بنانا اور انہیں ہراساں کرنا آزادی صحافت پر قدغن لگانے کے مترادف ہے اور جوعناصر اس قسم کی مذموم کارروائیوں میں ملوث ہیں وہ جمہوریت ، انسانیت اورآزادی صحافت کے کھلے دشمن ہیں۔ رابطہ کمیٹی نے حکومت اور اپوزیشن جماعتوں سے دردمندانہ اپیل کی کہ وہ پیشہ ورانہ فرائض کی ادائیگی میں مصروف صحافیوں کی جان ومال کا تحفظ یقینی بنائیں اور شرپسند عناصرپر کڑی نظررکھیں۔ رابطہ کمیٹی نے ماریہ میمن سے دلی ہمدردی کابھی اظہارکیا۔