جناب الطاف حسین کا جینا حرام کرنے کے بیان سے بلاول زرداری کی سیاسی کمزوری عیاں ہو گئی ہے، افتخار اکبر رندھاوا

کراچی ۔۔۔2دسمبر2014ء

متحد ہ قومی موومنٹ کی رابطہ کمیٹی کے رکن افتخار اکبر رندھا وا نے اپنے ایک بیان میں کہاہے کہ پیپلزپارٹی کے چےئر مین بلاول زرداری نے جناب الطاف حسین کا جینا حرام کرنے کا بیان عالم مدہوشی میں دیا ہے اور اس بیان سے انکی سیاسی کمزوری عیاں ہو گئی ہے۔افتخار اکبر رندھاوا نے پیپلز پارٹی چےئر مین کو تنقید کا نشانہ بناتے ہوئے کہا کہ پیپلز پارٹی ملک بھر میں جناب الطاف حسین کے نظریے کے فروغ سے خوف زدہ ہے جس کے سبب وہ غیر اخلاقی اور غیر سیاسی طرز کے بیانات اور اقدامات کا سہارا لے رہی ہے۔ افتخار رندھاوانے پیپلز پارٹی کے چےئر مین بلاول زرداری اور پیپلز پارٹی کی اعلیٰ قیادت سے مطالبہ کیا کہ وہ جناب الطاف حسین کو دھمکی دینے کے بیان کو فوری واپس لیں اور قوم سے معافی مانگیں ورنہ ایم کیو ایم کے ذمہ داران اور کارکنا ن اپنے قائد کو دھمکی دینے کے خلاف عدالتوں کے دروازے کھٹکھٹائیں گے۔