پیپلزپارٹی کے رہنما قائدتحریک الطاف حسین کے خلاف عدالتوں میں جانے کاشوق بھی پوراکرلیں، انہیں ماضی کی طرح اس مرتبہ بھی ذلت ورسوائی کا سامناکرناپڑے گا۔یوسف شاہوانی،رکن رابطہ کمیٹی ایم کیوایم

لندن۔۔۔2 دسمبر 2014ء

متحد ہ قومی موومٹ کی رابطہ کمیٹی کے رکن یوسف شاہوانی نے کہاہے کہ پیپلزپارٹی والے قائدتحریک الطاف حسین کے خلاف عدالتوں میں جانے کاشوق بھی پوراکرلیں انہیں ماضی کی طرح اس مرتبہ بھی ذلت ورسوائی کا سامناکرناپڑے گاکیونکہ وہ دنیاکے کسی بھی فورم پر بلاول زرداری کے دھمکی آمیزبیان کی حقیقت کونہیں جھٹلاسکتے جووڈیو ریکارڈنگ کی صورت میں موجودہے ۔ یوسف شاہوانی نے کہاکہ بلاول زرداری نے کسی وجہ کے بغیرمیڈیاکی موجودگی میں عوام کے سامنے قائدتحریک الطاف حسین جنہوں نے ہرمشکل وقت میں پیپلزپارٹی کے سربراہ اورسابق صدرآصف زرداری کاساتھ دیا،اپنے والدکے ایسے محسن کیلئے بلاول زرداری نے جودھمکی آمیز تقریرکی ہے اس نے بلوچوں کاسرشرم سے جھکادیاہے۔یوسف شاہوانی نے کہاکہ یہ امرافسوسناک ہے کہ پیپلزپارٹی کے رہنما بلاول زرداری کے دھمکی آمیز بیان پر شرمندگی کا مظاہرہ کرنے کے بجائے الٹابیہودہ بیانات دے رہے ہیں اورطرح طرح کے عذرپیش کررہے ہیں ۔یوسف شاہوانی نے کہاکہ اپنی غلطیوں کوتسلیم کرنے کے بجائے پیپلزپارٹی کے رہنماجس ڈھٹائی کامظاہرہ کررہے ہیں اسی طرزعمل کے باعث آج پیپلزپارٹی تیزی سے تنزلی کاشکارہے۔