بیٹی کی پیدائش پر بیوی کو جلانے کا واقعہ انتہائی افسوسناک اور خواتین کی بہتری کیلئے جھوٹے حکومتی دعوؤں کا کھلا ثبوت ہے،کشور زہرہ

کراچی ۔۔۔29نومبر2014ء

متحد ہ قومی موومنٹ کے شعبہ خواتین کی انچارج و رکن قومی اسمبلی کشور زہرہ و اراکین نے فیصل آباد میں بیٹی کی پیدائش پر بیوی کو زندہ جلانے کے واقعہ کی سخت الفاظ میں مذمت کرتے ہوئے واقعہ کو خواتین کے بنیادی حقوق کی خلاف ورزی قراردیا ہے ۔ایک مذمتی بیان میں انچار ج و اراکین شعبہ خواتین نے کہا کہ ملک میں ایک جانب حکومت اور مختلف فلاحی و سیاسی تنظیموں کی جانب سے خواتین کو آگے لانے اور انہیں ملک کی ترقی میں اعلیٰ کردار دینے کی باتیں اور مطالبے کئے جاتے ہیں جبکہ حقیقت میں حکومت ملک میں خواتین کی جان و مال اور عزت و آبرو کوتحفظ دینے میں بھی ناکا م نظر آتی ہے۔ انہوں نے کہا کہ بیٹی کی پیدائش پر بیوی کو جلانے کا واقعہ انتہائی افسوسناک اور خواتین کی بہتری کیلئے حکومت کے جھوٹے دعو ؤں کا کھلا ثبوت ہے۔ ایم کیوایم شعبہ خواتین نے وزیر اعظم میاں محمد نواز شریف ، وفاقی وزیر داخلہ چوہدری نثار علی خان ، وفاقی وزیر برائے انسانی حقو ق پرویز رشید ، وزیر اعلیٰ پنجاب میاں محمد شہباز شریف سے مطالبہ کیا ہے کہ وہ فیصل آباد میں پیش آنے والے انتہائی افسوس ناک واقعہ کے ذمہ دار شوہر کو کڑی سے کڑی سزا دیں اور ملک میں خواتین کے جان ، مال و عزت کوتحفظ فراہم کرنے کے ساتھ ساتھ خواتین کے خلاف تشدد روکنے کیلئے سخت سے سخت قوانین تشکیل دیں۔