گلشن اقبال ریذیڈینٹس کمیٹی کے زیراہتمام منعقدہ سہ روزہ اسپورٹس فیسٹیول کی اختتامی تقریب میں ایم کیوایم رابطہ کمیٹی کے رکن عارف خان ایڈووکیٹ کی بطور مہمان خصوصی شرکت
اسپورٹس فیسٹیول میں ہاکی ،بیٹ مینٹن ، ٹیبل ٹینس ، طائی کونڈو، جمناسٹک ، باسٹک بال ، اسکیٹنگ اور دیگر کھیلوں کے مقابلے منعقد ہوئے
کھیل کے میدان میں جو قومیں آگے ہوتی ہیں وہ ترقی و خوشحالی میں کبھی پیچھے نہیں رہ سکتی ، عارف خان ایڈووکیٹ سہ روزہ اسپورٹس فیسٹیول کی اختتامی تقریب کے شرکاء سے خطاب
کراچی: ۔۔۔17، نومبر2014ء
گلشن اقبال ریذیڈنٹس کمیٹی کے زیراہتمام اولیمپئن افتخار سید پارک میں سہ روزہ اسپورٹس فیسٹیول کا انعقاد کیا گیا جس کی اختتامی تقریب میں ایم کیوایم کی رابطہ کمیٹی کے رکن عارف خان ایڈووکیٹ نے بطور مہمان خصوصی شرکت کی ۔اس موقع پر حق پرست رکن قومی اسمبلی مزمل قریشی ، حق پرست رکن سندھ اسمبلی عدنان احمد ،ایم کیوایم گلشن اقبال ریذیڈینٹس کمیٹی کے انچارج ریحان شمیم و اراکین ، عالمی چیمپئن ٹرافی کھیلنے کیلئے پاکستان سے جانے والی ہاکی ٹیم کے کوچ شہناز شیخ ، ہاکی ٹیم کے کپتان و کھلاڑی اور مختلف شعبہ ہائے زندگی سے تعلق رکھنے والی شخصیات بھی موجود تھیں ۔ اسپورٹس فیسٹیول میں ہاکی ،بیٹ مینٹن ، ٹیبل ٹینس ، طائی کونڈو، جمناسٹک ،باسکٹ بال ، اسکیٹنگ اور دیگر کھیلوں کے مقابلے منعقد ہوئے جنہیں تین روز تک شائقین کی جانب سے زبردست پذیرائی ملتی رہی ۔ سہ روزہ اسپورٹس فیسٹیول کی اختتامی تقریب سے خطاب کرتے ہوئے عارف خان ایڈووکیٹ نے کہا کہ اسپورٹس فیسٹیول کا انعقاد صحت مند سرگرمیوں کیلئے انتہائی اہم ہے اورایم کیوایم کے قائد جناب الطاف حسین بھی صحت مند معاشرے کے قیام کی عملی جدوجہد کررہے ہیں ۔ انہوں نے کہاکہ کھیل کے میدان میں جو قومیں آگے ہوتی ہیں وہ ترقی و خوشحالی میں کبھی پیچھے نہیں رہ سکتی اور گلشن اقبال ریذیڈینٹس کمیٹی نے سہ روزہ اسپورٹس فیسٹیول کا کامیاب انعقادکرکے ثابت کردیا ہے کہ وہ صحت مند سرگرمیوں کو فروغ دے رہی ہے جس پر گلشن اقبال ریذیڈنٹس کمیٹی زبردست خراج تحسین کی مستحق ہے ۔عارف خان ایڈووکیٹ نے مزید کہا کہ ایم کیوایم کے تحت ملک بھر میں رکنیت سازی مہم جاری ہے اور اس مہم کی کامیابی سے واضح ہوگیا ہے کہ ایم کیوایم ملک بھر کے عوام کی مقبول ترین جماعت ہے ۔انہوں نے کہاکہ ایم کیوایم کی رکنیت سازی مہم ملک بھر کی مظلوم قومیتوں کا سہارا بنے گی اور ان کی ایم کیوایم میں شمولیت کے باعث نام نہاد جاگیردار ، وڈیرے اور سردار غریب و متوسط طبقے کے انقلاب کو ملک میں آنے سے ہرگز نہیں روک سکتے ۔ آخر میں عارف خان ایڈووکیٹ نے مختلف کھیلوں کے مقابلے میں کامیاب ہونے والے کھلاڑیوں میں میڈل ، ٹرافیاں اور انعامات بھی تقسیم کئے گئے اور انہیں جناب الطاف حسین کی جانب سے دلی مبارکباد پیش کی ۔