بدین میں ایم کیوایم کے رکنیت سازی کیمپ پر حملے اور توڑ پھوڑ پر ایم کیوایم رابطہ کمیٹی کااظہار مذمت

کراچی ۔۔۔14،نومبر2014ء 

متحدہ قومی موومنٹ کی رابطہ کمیٹی نے بدین میں ایم کیوایم کے رکنیت سازی کیمپ پر شرپسند عناصر کے حملے ، توڑ پھوڑ اور مغلظات بکنے کی شدید مذمت کی ہے اور اسے ایم کیوایم کی ملک بھر میں بڑھتی ہوئی مقبولیت سے خوفزدہ عناصر کی بزدلانہ کارروائی قرار دیا ہے ۔ ایک بیان میں رابطہ کمیٹی نے کہا کہ بعض نام نہاد سیاسی عناصر قائد تحریک جناب الطاف حسین کے حق پرستانہ فکر وفلسفہ اورنظریئے کے فروغ سے بوکھلاہٹ کا شکار ہیں اور ان کی جانب سے ایک مرتبہ پھر اوچھے ہتھکنڈے استعمال کئے جارہے ہیں ۔رابطہ کمیٹی مزید کہا کہ ایم کیوایم کی ر کنیت سازی مہم کے پہلے روز ہی شرپسند عناصر کا حملہ انتہائی افسوسناک ، نفرت اور تعصب کا کھلا ثبوت ہے ۔ رابطہ کمیٹی نے کہاکہ تھر کی صورتحال پر سندھ دھرتی کی نمائندگی کے دعویدار خاموش تماشائی کا کردار کررہے ہیں اورتھر میں ایم کیوایم کی جانب سے بڑے پیمانے پر کی جانے والی طبی وامدادی سرگرمیوں کے باعث ایم کیوایم کو نشانہ بنا کر اپنی ناکامی اور خفت کو مٹارہے ہیں ۔ رابطہ کمیٹی نے وزیراعظم نواز شریف ، وفاقی وزیر داخلہ چوہدری نثار علی خان ، گورنر سندھ ڈاکٹر عشرت العباد اور وزیر اعلیٰ سندھ سید قائم علی شاہ سے مطالبہ کیا کہ بدین میں ایم کیوایم کے رکنیت سازی کیمپ پر حملے اور توڑ پھوڑ میں ملوث عناصر کو فی الفور گرفتار کیاجائے اور ایم کیوایم کی سیاسی سرگرمیوں پر غیر جمہوری طریقے سے حملہ آور ہونے والے عناصر کی سخت گرفت کی جائے ۔