متحد ہ قومی موومنٹ اور خدمت خلق فاؤنڈیشن کی تھر کے قحط سالی سے متاثرہ مظلوم عوام کیلئے امدادی سرگرمیاں جاری ہے

تھر ۔۔۔۔11نومبر2014ء 

ایم کیوا یم کے قائد الطاف حسین کی جانب سے متحد ہ قومی موومنٹ اور خدمت خلق فاؤنڈیشن کی تھر کے قحط سالی سے متاثرہ مظلوم عوام کی امداد کا سلسلہ جاری ہے ۔ اس سلسلے میں منگل کو امدادی سرگرمیوں کے تیسرے روزخدمت خلق فاؤنڈیشن کی جانب سے تھر کے تعلقہ چھاچھرو اور مٹھی میں میڈیکل کیمپ اور امدادی کیمپ قائم کئے گئے جہاں خدمت خلق فاؤنڈیشن کے ڈاکٹر ز و پیرا میڈیکل اسٹاف کی جانب سے قحط کے سبب مختلف امراض کا شکار سینکڑوں معصوم بچوں ، خواتین ، بزرگوں کا مفت طبی معائنہ کرکے انہیں ادویات فراہم کی گئیں اور وبائی امراض سے بچاؤ کیلئے ضروری مشورے فراہم کئے گئے جبکہ امدادی کیمپ پر آنیوالے بھوک و افلاس کا شکار درجنوں مستحق خاندانوں میں اجناس بیگ، خشک دودھ ، پینے کا صاف پانی ،واٹر کولر و ضروریات زندگی کی دیگر اشیاء تقسیم کی گئیں۔ اس موقع پر ایم کیو ایم رابطہ کمیٹی و حق پرست ارکان اسمبلی کے مشترکہ وفد نے میڈیکل و امدادی کیمپس کا دورہ کیا اور فرائض کی انجام دہی میں مصروف ڈاکٹرز ، پیرا میڈکل اسٹاف اور امدادی عملے کے اہلکاروں سے ملاقات کرکے انہیں تھر کے معصوم عوام کو بہترین طبی و امدادی سہولیات کی فراہم کرنے کی ہدایت کی ۔ اس موقع پر اراکین رابطہ کمیٹی عبد الحسیب ، اشفاق احمد منگی ، افتخار اکبر رندھا وا، معاون رابطہ کمیٹی وسیم اختر ، غازی صلاح الدین ،حق پرست اراکین قومی و صوبائی اسمبلی سنجے پروانی،ڈاکٹر نگہت شکیل ،ڈاکٹر فوزیہ حمید، منجو مل بھیل ، ڈاکٹرظفر کمالی ، راشد خلجی ، پنجومل بھیل اور ایم کیو ایم کے مختلف مرکزی شعبہ جات کی خواتین و مرد کارکنان وفد میں شامل تھے۔وفد کے اراکین نے متاثرین سے ملاقات کر کے انکے مسائل جانے اور انہیں ہر ممکن امداد کی یقین دہانی کروائی ۔ اس موقع پر کیمپ پر آنے والے افراد نے طبی و غذائی اجناس کی فراہم پر جناب الطاف حسین اور ایم کیو ایم کے ذمہ داران کا شکریہ ادا کرتے ہوئے جناب الطاف حسین کی درازئ عمر اور صحت و تندرستی کیلئے دعائیں دیں ۔